Qozog‘istonda jamoat joylarida burqa va paranji kiyishni taqiqlashga qaratilgan yangi qonun loyihasi parlament tomonidan qabul qilindi. Bu haqda Zamin.uz xabar berdi.
Ushbu qonun 3-dekabr kuni Majlisning quyi palatasida ikkinchi o‘qishda ma’qullangan va endi Senatda ko‘rib chiqilishi kutilmoqda. Agar hujjat Senatda ham tasdiqlansa, uni davlat rahbari Qosim-Jomart To‘qayev imzolashi mumkin.
Qonunga ko‘ra, jamoat joylarida yuzni yopuvchi kiyim kiygan shaxs birinchi marta ogohlantiriladi. Agar bu holat qayta takrorlansa, 10 oylik hisoblash ko‘rsatkichi miqdorida, ya’ni 40 ming tenge (taxminan 80 dollar) jarima solinadi.
Ushbu chora-tadbirlarning asosiy maqsadi jamoat joylarida yuzni yopishni cheklash va odamlar o‘rtasida ochiq muloqotni ta’minlashdir. Qonun Ma’muriy huquqbuzarliklar to‘g‘risidagi kodeksga o‘zgartirishlar kiritishni ham nazarda tutadi.
Unda din yoki siyosiy maqsadlar uchun majburiy kiyimlarni taqiqlash masalasi ham ko‘rib chiqilgan. Burqa ham ushbu taqiqlangan kiyimlar qatoriga kiritiladi.
Qozog‘istonda burqani taqiqlash masalasi bir necha yildan beri muhokama qilinmoqda. Prezident Qosim-Jomart To‘qayev 2024-yilning mart oyida burqani radikal va ekstremistik kayfiyatdagi shaxslar ayollarga majburan kiydirayotganini ta’kidlagan edi.
Uning fikricha, bu kiyim Qozog‘istonning an’anaviy qadriyatlariga mos emas. Shuningdek, 2023-yilning oktyabr oyida O‘zbekistonda ham yuzni yopuvchi kiyimlarga ma’muriy jarimalar belgilash haqidagi qonun qabul qilingani ma’lum.
Bu borada ikki davlatda o‘xshash chora-tadbirlar ko‘rilmoqda.
