Qozog‘istonda bolalarga ijtimoiy tarmoq cheklovi kutilmoqda

Qozog‘iston hukumati 16 yoshgacha bo‘lgan bolalar uchun ijtimoiy tarmoqlarda akkaunt ochishni taqiqlashni rejalashtirmoqda. Bu haqda Zamin.uz xabar berdi.

Ushbu cheklov videoxostinglar, ijtimoiy tarmoqlar va boshqa yirik onlayn platformalarga nisbatan joriy etilishi mumkin. Mazkur qaror bolalarni zararli kontentdan himoya qilish maqsadida ishlab chiqilgan.

Cheklov faqat messenjerlarga taalluqli emas, ya’ni bolalar ushbu platformalardan foydalanishda davom etishlari mumkin. Ma’lumotlarga ko‘ra, qonun loyihasi bir necha bor qayta ko‘rib chiqilib, 80 dan ortiq o‘zgartirishlar kiritilgan.

Agar tasdiqlansa, yangi qoidalar kelgusi yilda kuchga kirishi mumkin. Mutasaddilarning ta’kidlashicha, mazkur choralar bolalarning onlayn xavfsizligini ta’minlash va ularning sog‘lom rivojlanishini qo‘llab-quvvatlash uchun ishlab chiqilgan.

Hozirda ushbu tashabbus katta e’tiborda bo‘lib, uning amalga oshirilishi jamiyatda keng muhokama qilinmoqda.