Nigeriyada odam o‘g‘irlashga qarshi favqulodda choralar ko‘rildi
Nigeriya Prezidenti Bola Ahmad Tinubu mamlakatda odam o‘g‘irlash holatlarining ko‘payishi sabab favqulodda holat e’lon qildi. Bu haqda Zamin.uz xabar berdi.
Ushbu muammoning oldini olish maqsadida u qurolli kuchlar va politsiya tarkibiga qo‘shimcha xodimlar jalb qilishni buyurdi. Yangi chora-tadbirlarga ko‘ra, politsiya safiga 20 ming nafar yangi xodim qabul qilinadi va umumiy tarkib 50 ming nafarga yetkaziladi.
Prezident Tinubu uzoq hududlarda joylashgan maktablarning xavfsizligini oshirish yuzasidan choralar ko‘rishga chaqirdi. Shuningdek, diniy maskanlar, jumladan, masjid va cherkovlarda xavfsizlikni ta’minlash uchun qo‘shimcha yordam so‘rash tavsiya etildi.
Mamlakatda chorvadorlarga hayvonlarini ochiq yaylovlarda boqishni cheklash va noqonuniy qurollarni topshirish bo‘yicha ko‘rsatmalar berildi. Ayni vaqtda, AQSh Nigeriya hukumatini isyonchilar tomonidan nasroniylarga qarshi sodir etilayotgan zo‘ravonliklarga e’tibor bermayotganlikda aybladi.
Biroq, Nigeriya hukumati bu masalani diniy emas, balki ijtimoiy muammo sifatida baholamoqda. Mamlakat rasmiylari vaziyatni barqarorlashtirish uchun barcha zarur choralarni ko‘rishni maqsad qilgan.
