Putin Hindistonda: Neft, mudofaa va savdo aloqalari muhokamada
Rossiya Prezidenti Vladimir Putin Hindistonga ikki kunlik rasmiy tashrif bilan yetib keldi. Bu haqda Zamin.uz xabar berdi.
Dehli shahrida uni Hindiston Bosh vaziri Narendra Modi samimiy kutib oldi. Tashrif davomida ikki davlat o‘rtasidagi iqtisodiy va strategik hamkorlikni rivojlantirishga qaratilgan bir qator kelishuvlar imzolanishi kutilmoqda.
Hindiston Rossiya neftining eng yirik xaridorlaridan biri hisoblanadi. Avvalgi yillarda Hindistonning neft importidagi Rossiya ulushi 2,5 foizni tashkil etgan bo‘lsa, hozirda bu ko‘rsatkich 35 foizga yetgan.
Bu o‘zgarish Moskvaning cheklangan eksport imkoniyatlaridan foydalangan holda neft narxlari bo‘yicha imtiyozlar olish bilan bog‘liq. Shuningdek, mudofaa sohasida hamkorlik davom etmoqda.
Hindiston harbiy havo kuchlari ko‘p jihatdan Rossiya texnikasiga, xususan, Suxoi-30 qiruvchi samolyotlari va S-400 havo mudofaa tizimlariga tayanadi. Kelgusida Hindiston S-500 tizimlari va Su-57 beshinchi avlod qiruvchilarini xarid qilishni rejalashtirayotgani ma’lum.
Narendra Modi Rossiya bilan savdo va iqtisodiy aloqalarni yanada diversifikatsiya qilishni maqsad qilgan. Neft va mudofaa sohalaridan tashqari, boshqa tarmoqlarda hamkorlikni rivojlantirish Hindistonning strategik mustaqilligini ta’minlash hamda G‘arb davlatlari bilan hamkorlikni davom ettirishda muhim rol o‘ynashi kutilmoqda.
