Ispaniya va uch davlat "Yevrovideniye-2026"ni boykot qildi
"Yevrovideniye-2026" tanlovi atrofida yuzaga kelgan mojaro: Ispaniya va yana uch davlat boykot e’lon qildi Yevropa efir uzatuvchilar ittifoqi (EBU) tomonidan Isroilning "Yevrovideniye-2026" tanlovida ishtirok etishiga ruxsat berilgani tanlov atrofida jiddiy tortishuvlarga sabab bo‘ldi. Bu haqda Zamin.uz xabar berdi.
Ayrim davlatlar Isroilni G‘azo hududidagi harbiy harakatlar va ularning og‘ir gumanitar oqibatlari tufayli tanlovdan chetlatishni taklif qilishdi. Ushbu qarorga norozilik bildirgan Irlandiya, Ispaniya, Niderlandiya va Sloveniya kelgusi yildagi tanlovni boykot qilishlarini e’lon qilishdi.
Mazkur davlatlar EBU yig‘ilishida Isroil masalasini yopiq ovoz berish yo‘li bilan hal qilishni talab qilishgan edi. Ammo Jenevada bo‘lib o‘tgan majlisda bu talab rad etilib, kelishuvga asoslangan yangi qoidalar tasdiqlandi.
Rasmiy bayonotga ko‘ra, "Yevrovideniye-2026" tanlovi rejalashtirilgan formatda, ammo xavfsizlik choralari kuchaytirilgan holda o‘tkaziladi. Isroil prezidenti Isaak Gersog EBU qarorini qo‘llab-quvvatlab, uni Isroilga nisbatan birdamlik va do‘stlik ifodasi sifatida baholadi.
Biroq, boykot e’lon qilgan davlatlarning tanlovdan chiqishi jiddiy oqibatlarga olib kelishi mumkin. Xususan, Ispaniya "Katta beshlik" a’zosi bo‘lib, tanlovni moliyalashtirishda katta hissa qo‘shadi.
Ispaniya va Niderlandiyaning tanlovdan chiqishi musiqiy loyihaning nufuzi va birdamligiga salbiy ta’sir ko‘rsatishi kutilmoqda. Ayrim yirik Yevropa davlatlarining qarori tanlovni musiqiy tadbirdan ko‘ra siyosiy maydonga aylantirib qo‘yayotgani haqida bahs-munozaralarning kuchayishiga sabab bo‘lmoqda.
Bu holat "Yevrovideniye"ning birdamlik va musiqiy san’atni targ‘ib qilishdagi asosiy maqsadlariga soya solishi ehtimoldan holi emas.
