Qozog‘istonning Olmaota shahrida mamlakatdagi eng kutilgan tadbirlardan biri — “Miss Qozog‘iston-2025” tanlovining final bosqichi bo‘lib o‘tdi. Bu haqda Zamin.uz xabar berdi.
Unda butun mamlakat bo‘ylab saralangan 20 nafar go‘zal raqobatlashdi. Tantanali kecha shaharning nufuzli restoranlaridan birida tashkil etilib, podium namoyishlari, turli uslubdagi chiqishlar hamda ijodiy sahnalar bilan boyitildi.
Joriy yilgi tanlovda 22 yoshli chimkentlik Alina Yekaterinecheva g‘olib deb topildi. U final bosqichida o‘zining sahna madaniyati, ishonchli chiqishlari va tabiiy jozibasi bilan ajralib turdi.
Tanlov g‘olibi sifatida Alina endi Qozog‘istonni “Koinot go‘zali-2026” musobaqasida namoyish etadi. Alina ijodkor oilada tarbiya topgan.
U uch yoshidan boshlab raqsga qiziqib, ko‘plab sahnalarda chiqishlar qilgan. 14 yoshida esa modellik faoliyatini boshlagan va Guess hamda Constella kabi mashhur brendlar bilan hamkorlik qilgan.
Shuningdek, u huquqshunoslik yo‘nalishida oliy ta’lim olgan. Tanlovda boshqa ishtirokchilar ham turli mukofotlarga sazovor bo‘lishdi.
Shodiyora Baykenova “Dunyo go‘zali Qozog‘iston-2025” unvonini qo‘lga kiritib, 2027 yilgi xalqaro finalda qatnashish huquqini qo‘lga kiritdi. Anel Yemel “Miss Grand International Qazaqstan-2025” unvoniga loyiq ko‘rilib, 2026 yilgi jahon finaliga yo‘llanma oldi.
“Vitse-Miss Qozog‘iston-2025” unvoni Dilnoz Sarsenbayga berildi, “2-vitse-Miss” esa Kamila Dauletova bo‘ldi. Xalq tanlovi g‘olibi sifatida Alina Nurahmedova e’lon qilindi.
Go‘zallik tanlovi Qozog‘istonda doimo katta qiziqish uyg‘otib keladi. Bu yilgi final ham tomoshabinlar uchun hayajon va his-tuyg‘ularga boy bo‘ldi.
Shu bilan birga, yangi yulduzlar sahnaga chiqdi va o‘z iste’dodlarini namoyish etdi.
