Niderlandiya yetti yil davomida ingliz tilida yetakchi
EF English Proficiency Index reytingiga ko‘ra, Yevropa mamlakatlari orasida ingliz tilini eng yaxshi o‘zlashtirgan davlatlar ro‘yxati e’lon qilindi. Bu haqda Zamin.uz xabar berdi.
Ushbu reytingda Niderlandiya ketma-ket yetti yil davomida birinchi o‘rinni egallab kelmoqda. Bu mamlakat aholisi ingliz tilidan foydalanishda yuqori darajadagi aniqlik va erkinlikka ega ekanini yana bir bor isbotladi.
Reytingda Niderlandiyadan keyingi o‘rinlarni Xorvatiya va Avstriya egallagan. Ushbu mamlakatlarda ingliz tili ta’lim va ish muhitida keng qo‘llanilib, uning ahamiyati yuqori ekanligi qayd etilgan.
Biroq Italiya, Kipr va Fransiya kabi davlatlarda ingliz tilini bilish darajasi o‘rtacha yoki undan past darajada qolmoqda. Mutaxassislar bu holatni ta’lim tizimi, yosh tarkibi va tilni amalda qo‘llash imkoniyatlari bilan bog‘lamoqda.
Tadqiqot 2,2 million kattalar ishtirokida o‘tkazilgan test natijalariga asoslangan. Natijalarga ko‘ra, o‘qish va tinglash ko‘nikmalari eng kuchli bo‘lsa, gapirish va yozish nisbatan pastroq darajada ekani aniqlangan.
E’tiborga molik jihat shundaki, 2014–2025-yillar davomida erkaklarning ingliz tilini bilish darajasi 40 ballga, ayollarniki esa 20 ballga oshgan. Biroq pandemiyadan keyingi davrda yoshlar orasida til bilish qobiliyatining pasayishi kuzatilgan.
Bu holat onlayn ta’lim va amaliy muhitning cheklanganligi bilan izohlanmoqda.
