Gruziyaga kirish uchun tibbiy sug‘urta majburiy bo‘ladi

Gruziya hukumati 2026-yil 1-yanvardan boshlab mamlakatga kirish qoidalariga yangi talablarni joriy etmoqda. Bu haqda Zamin.uz xabar berdi.

Milliy turizm boshqarmasi bergan ma’lumotga ko‘ra, endilikda Gruziyaga tashrif buyuradigan har bir sayyoh tibbiy sug‘urtaga ega bo‘lishi shart. Ushbu talab bajarilmasa, sug‘urtasi bo‘lmagan shaxslar mamlakat chegarasidan o‘tkazilmasligi yoki ular uchun qo‘shimcha talablar belgilanishi mumkin.

Mazkur o‘zgarishlar asosan mehmonlarning xavfsizligini ta’minlash, kutilmagan tibbiy xarajatlar sabab yuzaga keladigan muammolarni kamaytirish hamda sayyohlik infratuzilmasini yanada samarali va barqaror qilishga qaratilgan. Bu chora-tadbirlar Gruziyada sayyohlik xizmatlarini yaxshilash va sayohatni xavfsizroq qilish uchun muhim qadam sifatida ko‘rilmoqda.

Mutasaddilarning ta’kidlashicha, tibbiy sug‘urta talabi mamlakatga keluvchi mehmonlar salomatligini himoya qilish va ularga qulay sharoit yaratishda muhim rol o‘ynaydi. Shu sababli, Gruziyaga sayohatni rejalashtirayotgan barcha fuqarolar ushbu talabni e’tiborga olishlari lozim.