Tom Xolland Instagram’ida Larisa Dolina mojarosi
Marvel kinosidagi O‘rgimchak-odam rolini ijro etgan mashhur aktyor Tom Xollandning Instagram sahifasi rus tilida so‘zlashuvchi foydalanuvchilar tomonidan ko‘plab izohlar bilan to‘ldirildi. Bu haqda Zamin.uz xabar berdi.
Ular taniqli qo‘shiqchi Larisa Dolinadan firibgarlik yo‘li bilan olingan mablag‘ni qaytarishni talab qilmoqda. Ma’lum bo‘lishicha, firibgar Dolinani chalg‘itish uchun Tom Xollandning fotosurati aks ettirilgan soxta hujjatdan foydalangan.
Bu haqda qo‘shiqchi "Pust govoryat" dasturida ochiq gapirib o‘tgan. Tom Xollandning Instagram’dagi postlariga foydalanuvchilar tomonidan turli hazil va kinoyali izohlar yozilgan.
Ba’zilari bu voqeani "O‘rgimchak-odam: Uyga qaytish" filmi nomi bilan bog‘lab, kulgili sharhlar qoldirishgan. Boshqalar esa vaziyatni tanqid qilib, hatto Gollivud aktyorlari ham firibgarlik bilan shug‘ullanishga majbur bo‘ldimi, deya istehzoli izohlar yozishgan.
Bu holatdan norozi bo‘lgan va rus xalqi nomidan uzr so‘ragan foydalanuvchilar ham uchragan. Ularning biri ingliz tilida quyidagicha xabar qoldirgan: "Hurmatli Tom, barcha ruslar nomidan ko‘p sonli izohlar uchun uzr so‘rayman!
Bu vaziyat bizning qo‘shiqchimiz Larisa Dolina bilan bog‘liq. Biz seni sevamiz va qadrlaymiz!" Mazkur voqea internetda keng muhokamalarga sabab bo‘lmoqda.
Foydalanuvchilar o‘rtasida turli fikrlar bildirilmoqda, biroq aksariyat hollarda bu voqea hazil va kinoya bilan qarshi olinmoqda.
