Ishga erta kelgan ayol ishdan bo‘shatildi

Ispaniyada yetkazib berish xizmatida ishlovchi ayol ishga belgilangan vaqtdan oldin kelgani uchun ishdan bo‘shatildi. Bu haqda Zamin.uz xabar berdi.

Kompaniya bu holatni ichki qoidalarga zid harakat sifatida baholagan. Ayolning mehnat shartnomasida ish vaqti 07:30 da boshlanishi qat’iy belgilangan edi.

Ammo u muntazam ravishda 06:45–07:00 oralig‘ida kelib, smenasini erta boshlagan. Kompaniya rahbariyati bu odat ish jarayonidagi muvozanatni buzishi va navbatchilik tartibiga aralashishi mumkinligini bir necha bor tushuntirgan.

2023 yilda xodimga rasmiy ogohlantirish berilganiga qaramay, u o‘z xatti-harakatini davom ettirgan. Natijada kompaniya intizomga rioya qilmaslik sababli ayolni ishdan bo‘shatishga qaror qilgan.

Kompaniya bayonotida ta’kidlanishicha, xodimning erta kelishi ish jarayoniga ijobiy ta’sir ko‘rsatmagan, aksincha, vazifalar taqsimotiga salbiy ta’sir qilgan. Mazkur qarordan norozi bo‘lgan xodim Alikante ijtimoiy sudiga murojaat qilgan.

Ammo sud ish beruvchi tomonini qo‘llab-quvvatladi va xodimning takroriy ogohlantirishlarga qaramay o‘z harakatlarini davom ettirganini qayd etdi. Ispaniyada mehnat intizomi va ish vaqti rejimi qat’iy nazorat qilinadi.

Shu sababli, hatto ijobiy ko‘rinadigan “erta kelish” ham qonunchilik nuqtayi nazaridan intizom buzilishi sifatida baholanishi mumkin.