Kongo Demokratik Respublikasida vabo epidemiyasi kuchayib, jiddiy muammoga aylangan. Bu haqda Zamin.uz xabar berdi.
Rasmiy ma’lumotlarga ko‘ra, joriy yilning so‘nggi 9 oyi davomida mamlakatda 64 mingdan ortiq vabo holati qayd etilgan, 1888 nafar bemor vafot etgan. Eng tashvishlisi, kasallikka chalinganlarning katta qismini bolalar tashkil etadi.
14 mingdan ortiq bola vaboga duchor bo‘lgan va ulardan 340 nafari hayotdan ko‘z yumgan. Epidemiya mamlakatning 26 provinsiyasidan 17 tasiga tarqalgan.
Poytaxt Kinshasa eng yirik o‘choqlardan biri sifatida qayd etilmoqda. Mutaxassislar vaziyatning yanada og‘irlashishini oldini olish uchun davlat darajasidagi favqulodda choralar ko‘rish zarurligini ta’kidlashmoqda.
Mutasaddilar fikricha, vaboning oldini olish mumkin, buning uchun ichimlik suvi ta’minoti, sanitariya tizimi va tibbiy xizmat sifati xavfli hududlarda yaxshilanishi lozim. Kasallik asosan vabo vibrioni bilan zararlangan suv yoki oziq-ovqat orqali yuqadi.
Jahon sog‘liqni saqlash tashkilotining ma’lumotlariga ko‘ra, dunyo bo‘yicha har yili 1,4 million kishi toza suv va sanitariya sharoitlarining yetishmasligi sababli hayotdan ayriladi. Shu bois, ayniqsa bolalar yashaydigan hududlarda profilaktika choralarini kuchaytirish dolzarb masala bo‘lib qolmoqda.
