Peterburgda o‘zbek migrantlari huquqlari himoyasi kuchaytiriladi
Peterburg shahrida o‘zbek migrantlarining huquqlarini himoya qilish bo‘yicha chora-tadbirlar kuchaytiriladi. Bu haqda Zamin.uz xabar berdi.
O‘zbekistonning Migratsiya agentligi vakolatxonasi va Qirg‘izistonning Sankt-Peterburgdagi Bosh konsulligi shaharning Advokatlar palatasi hamda Xalqaro advokatlar kollegiyasi "Sankt-Peterburg" bilan hamkorlik kelishuvlarini imzoladi. Ushbu kelishuvlar bir yil davomida amal qiladi va Rossiyada, xususan, Sankt-Peterburg va Leningrad viloyatida mehnat qilayotgan O‘zbekiston va Qirg‘iziston fuqarolariga yordam ko‘rsatishga qaratilgan.
Kelishuv doirasida rossiyalik advokatlar migratsiya, mehnat, ma’muriy, fuqarolik va jinoyat huquqi bo‘yicha ixtisoslashgan mutaxassislar ro‘yxatini tuzadi. Ular migrantlarga bepul maslahat berish, sud va davlat idoralarida huquqiy yordam ko‘rsatish, shuningdek, ma’ruzalar va seminarlar tashkil etish orqali ko‘maklashadi.
Bundan tashqari, migrantlar uchun foydali materiallar va ma’lumotlar almashinuvi yo‘lga qo‘yiladi. Mazkur chora-tadbirlar Rossiyada mehnat qilayotgan o‘zbek va qirg‘iz fuqarolarining huquqiy muammolarini hal qilish, ularning mehnat sharoitlarini yaxshilash va huquqlarini himoya qilishga xizmat qilishi kutilmoqda.
