Ishga erta kelgan ayol ishdan bo‘shatildi
Ispaniyada yetkazib berish xizmatida ishlaydigan bir ayol ishga belgilangan vaqtdan ancha oldin kelgani uchun ishdan bo‘shatildi. Bu haqda Zamin.uz xabar berdi.
Bu holat ish beruvchilar tomonidan mehnat intizomini buzish sifatida baholangan. Ushbu voqea haqida Oddity Central nashri xabar berdi.
Ayolning ish kuni shartnomaga ko‘ra ertalab soat 07:30 da boshlanishi lozim edi. Biroq, u doimiy ravishda soat 06:45 va 07:00 oralig‘ida ish joyiga kelib, smenani hamkasblaridan oldin boshlagan.
Rahbariyat bunday odatni ish jarayonini buzuvchi holat sifatida baholagan va bu jamoada nizolarga sabab bo‘lishi mumkinligini qayd etgan. Shu sababli xodimga bir necha bor ogohlantirish berilgan.
Birinchi tanbeh 2023 yilda berilgan, ammo ayol ushbu ogohlantirishlarga e’tibor bermay, ishga erta kelishda davom etgan. Natijada, rahbariyat xodimni "jiddiy aybi" uchun ishdan bo‘shatishga qaror qildi.
Ularning fikricha, belgilangan tartibni buzish ish jarayoniga salbiy ta’sir ko‘rsatgan va kompaniyaning samaradorligini pasaytirgan. Ayol bu qarorga rozi bo‘lmay, ishdan bo‘shatilishiga e’tiroz bildirib, Alikante ijtimoiy sudiga murojaat qilgan.
Sud esa ish beruvchining qarorini qo‘llab-quvvatladi. Sudning rasmiy bayonotida xodimning harakatlari kompaniya va xodim o‘rtasidagi ishonch munosabatlariga putur yetkazgani ta’kidlangan.
Shuningdek, ogohlantirishlarga qaramay, tartibga rioya qilinmagani sud tomonidan jiddiy qonunbuzarlik sifatida baholangan. Shu bois sud ishdan bo‘shatish qarorini qonuniy deb topdi.
