Yaponiyada 6,7 magnitudali zilzila va sunami xavfi e’lon qilindi
8-dekabr kuni Yaponiyaning shimoli-sharqida joylashgan Aomori prefekturasi sohillarida 6,7 magnitudali kuchli zilzila sodir bo‘ldi. Bu haqda Zamin.uz xabar berdi.
Ushbu hodisa Yaponiyaning Milliy meteorologiya boshqarmasi tomonidan qayd etilib, 1 metr balandlikdagi sunami xavfi e’lon qilindi. Zilzila yer qa’rining 20 kilometr chuqurligida yuz bergan bo‘lib, Miyagi, Ivate va Aomori prefekturalari hamda Hokkaydo orollariga xavf tug‘dirgan.
Bu hududda avvalgi 7,5 magnitudali zilziladan so‘ng yana bir kuchli yer silkinishi kuzatildi. O‘sha zilzila natijasida sunami yuzaga kelgan va 40 ga yaqin odam jarohat olgan edi.
Mutaxassislarning ta’kidlashicha, ushbu zilziladan so‘ng ham takroriy yer silkinishlari, ya’ni aftershoklar sodir bo‘lishi ehtimoli mavjud. Shu sababli hudud aholisi hushyorlikni saqlashi va xavfsizlik choralarini ko‘rishi zarur.
