Yaponiyaning shimoli-sharqiy hududida 12-dekabr kuni 6,7 magnitudali zilzila sodir bo‘ldi. Bu haqda Zamin.uz xabar berdi.
Reuters agentligi xabariga ko‘ra, zilzila Aomori prefekturasi sohilidan 20 kilometr chuqurlikda, mahalliy vaqt bilan soat 11:44 da qayd etilgan. Yaponiya meteorologiya agentligi 1 metrgacha bo‘lgan to‘lqinlar ko‘rinishida sunami xavfi haqida ogohlantirdi.
Bundan oldin, 8-dekabr kuni ushbu hududda 7,5 magnitudali kuchliroq zilzila kuzatilgan edi. So‘nggi yer silkinishlari natijasida 34 nafar fuqaro yengil tan jarohati oldi, ba’zi yo‘llar va binolarga zarar yetdi.
Hukumat aholini hushyor bo‘lishga chaqirib, 2011-yildagi yirik zilzila va sunamiga o‘xshash holatlarga tayyor turishni tavsiya qilmoqda. Ma’lumotlarga ko‘ra, o‘sha falokatda taxminan 20 ming kishi halok bo‘lgan edi.
Rasmiylar kelgusi bir hafta ichida 8 magnitudali yoki undan ham kuchli zilzila yuz berishi ehtimoli yuqori ekanini ta’kidlamoqda. Shu sababli, qirg‘oqbo‘yi hududlarida yashovchi aholiga xavfsizlik choralarini kuchaytirish tavsiya etildi.
2024-yil yozida Nankai jarligi hududida ham kuchli zilzila yuz berishi mumkinligi haqida ogohlantirish berilgan. Bu ogohlantirish ortidan ijtimoiy tarmoqlarda turli video xabarlar tarqalgan, ammo hukumat aholiga vahimaga berilmaslikni maslahat bermoqda.
