Qozog‘istonning Olmaota shahrida chaqaloqlar savdosi bilan shug‘ullangan jinoiy guruh fosh etildi. Bu haqda Zamin.uz xabar berdi.
Bu haqda Qozog‘iston Ichki ishlar vazirligi rasmiy axborotiga asoslanib, Polisia.kz xabar berdi. Aniqlanishicha, mamlakatning turli hududlarida o‘tkazilgan tezkor tadbirlar davomida yosh onalarning og‘ir sharoitlaridan foydalanib, ularni yangi tug‘ilgan chaqaloqlarini sotishga undagan guruh faoliyatiga chek qo‘yilgan.
Ushbu jinoiy guruh a’zolari yosh ayollarni aldab, ularga moddiy yordam va’da qilib, farzandlaridan voz kechishga majbur qilgan. Hozirda guruh a’zolari qo‘lga olingan va ularga nisbatan 20 dan ortiq jinoyat ishi bo‘yicha tergov ishlari olib borilmoqda.
Shuningdek, "STOP-trafik" profilaktik tadbirlari doirasida Ostona, Olmaota va Shimkent shaharlarida fohishabozlikni tashkil etgan boshqa jinoiy guruhlar ham aniqlangan. Ushbu shaxslar tungi klublar va barlarda yosh qizlarni ishga jalb qilib, noqonuniy faoliyat yuritgan.
Ichki ishlar vazirligining ma’lum qilishicha, Shimkent, Aqtobe, Jambul, G‘arbiy Qozog‘iston, Qarag‘andi va Qostanay viloyatlarida jinoyatchilikka qarshi kurash davom etmoqda. Tadbirlarda yoshlarni jinoyatlardan himoya qilish va jamiyatda axloqiy qadriyatlarni mustahkamlashga alohida e’tibor qaratilmoqda.
