Olmaota vokzalida 52 kishi gazdan zaharlandi
Qozog‘istonda Olmaota-2 vokzalida joylashgan poyezdda 52 kishi noma’lum gazdan zaharlanish holati qayd etildi. Bu haqda Zamin.uz xabar berdi.
Voqea yuzasidan yordam ko‘rsatish uchun 13 ta tez tibbiy yordam guruhi safarbar qilindi. Dastlabki ma’lumotlarga ko‘ra, hodisa tabiiy gazdan zaharlanish oqibatida yuzaga kelgani taxmin qilingan.
Biroq, Qozog‘iston temir yo‘llari operatori bu ma’lumotni rad etib, zaharlanishning sababi uglerod oksidi bo‘lishi mumkinligini ta’kidladi. Shu bilan birga, Qozog‘iston temir yo‘llari hodisaga aloqasi yo‘qligini bildirgan.
Ma’lum bo‘lishicha, poyezd xususiy kompaniyaga tegishli bo‘lib, vagonlar kinostudiya tomonidan suratga olish ishlari uchun ijaraga olingan. Hodisa natijasida 10 nafar bola kasalxonaga yotqizilgan.
Ayni paytda tergov ishlari olib borilmoqda va hodisaning aniq sabablari o‘rganilmoqda.
