Ukraina kuchlari Kupyanskda Rossiya qo‘shinlarini qurshovga oldi
Ukraina Prezidenti Volodimir Zelenskiy 12-dekabr kuni Xarkiv viloyatidagi Kupyansk shahri yaqinida joylashgan stela yonida turib, videomurojaat e’lon qildi. Bu haqda Zamin.uz xabar berdi.
U mazkur hududda muvaffaqiyatli harbiy harakatlarni amalga oshirgan harbiylarni tabriklash uchun shaxsan kelganini ma’lum qildi. Prezident o‘z murojaatida shunday dedi: “Bugun Kupyansk yo‘nalishida Ukraina uchun muhim natijaga erishayotgan harbiylarimiz faoliyatini kuzatdingiz.
Rossiya bu hudud haqida ko‘p gapirdi, biz esa natijani ko‘rsatmoqdamiz. Harbiylarimizni qutladim va ularga minnatdorlik bildirdim”.
Ukraina mudofaa kuchlari shu kuni Kupyansk atrofida muvaffaqiyatli qarshi hujumni amalga oshirib, shahardagi Rossiya qo‘shinlarini qurshovga olishga erishdi. Milliy gvardiyaning “Xartiya” qidiruv-zarba guruhi ma’lumotlariga ko‘ra, ular bir necha yo‘nalishda harakat qilib, Rossiya kuchlarining logistikasini uzib tashlagan.
“Xartiya” 2-korpusi qo‘mondoni Igor Obolenskiy vaziyatga izoh berib, Rossiya qo‘shinlari shaharda to‘liq qurshovda ekanini va ular bu holatni endi anglayotganini ta’kidladi. Shuningdek, Kondrashovka qishlog‘i va uning atrofidagi hududlar, Radkovka qishlog‘i va Kupyansk shimolidagi ayrim hududlar to‘liq ozod qilingan.
Qo‘mondonlikning ma’lum qilishicha, Rossiya kuchlari zaxiralarini safarbar etib, mudofaani yorib o‘tishga harakat qilmoqda, ammo bu urinishlar muvaffaqiyatsizlikka uchramoqda. Janglarda Suriya va Afrika mamlakatlaridan kelgan xorijlik jangarilar ham ishtirok etayotgani qayd etilgan.
“Xartiya” bo‘linmalari tomonidan o‘tkazilgan operatsiyalar davomida Rossiya qo‘shinlariga katta talafot yetkazilgan. Ma’lumotlarga ko‘ra, 1027 nafar rossiyalik harbiy yo‘q qilingan, 291 nafar harbiy yaralangan, 13 nafari esa asirga olingan.
Kupyansk shahrining markazida janglar davom etayotgan bo‘lsa-da, shahar to‘liq ozod qilinishi kutilmoqda. DeepState OSINT loyihasi xaritasida ham Kupyanskning shimoli-g‘arbiy qismi Rossiya harbiylaridan tozalangani tasdiqlangan.
