Zelenskiy: Kupyanskda Ukraina kuchlari yutuqqa erishdi
Ukraina prezidenti Volodimir Zelenskiy 12-dekabr kuni Xarkiv viloyatidagi Kupyansk shahri yaqinida joylashgan stela oldida videomurojaat yo‘lladi. Bu haqda Zamin.uz xabar berdi.
Ushbu murojaat Rossiya prezidenti Vladimir Putin tomonidan Kupyansk “egallangani” haqida berilgan hisobotlar fonida e’tibor tortdi. Ukraina qurolli kuchlari esa ushbu hududda muvaffaqiyatli qarshi hujum uyushtirilgani va Rossiya qo‘shinlari qurshab olinganini ma’lum qildi.
Zelenskiy o‘z murojaatida Kupyansk bo‘yicha Rossiya tarafidan berilgan bayonotlarni rad etdi. U shunday dedi: “Bugun Kupyansk yo‘nalishi bo‘yicha bizning jangchilarimiz muhim yutuqlarga erishmoqda.
Rossiyaliklar bu haqda ko‘p gapirishdi, lekin biz buni o‘z ko‘zimiz bilan ko‘rib turibmiz. Men yigitlarni tabrikladim.” Murojaat davomida portlash ovozlari eshitilgan.
Ukrainaning “Xartiya” korpusi sentyabr oyida ushbu hududdagi vaziyat murakkablashganidan keyin tashkil etilgan. Guruh tarkibiga bir nechta brigada va harbiy qismlar kiritilib, asosiy vazifa Rossiya qo‘shinlarini yo‘q qilish va ularni ta’minotdan uzib qo‘yish bo‘lgan.
12-dekabr kuni “Xartiya” korpusi Kupyanskdagi Rossiya kuchlarini qurshovga olishga muvaffaq bo‘lgani haqida xabar berdi. Ularning ma’lumotiga ko‘ra, Oskol daryosining o‘ng sohilidagi dushman kuchlari ta’minotdan uzilgan.
“Xartiya” korpusi qo‘mondoni Igor Obolenskiyning ta’kidlashicha, shahardagi Rossiya qo‘shinlari asosiy kuchlaridan uzilib qolgan va hozirgi kunda ular to‘liq qurshovda. Shuningdek, ukrain kuchlari Kupyanskdan shimoldagi Kondrashovka va Radkovka qishloqlarini, shuningdek, boshqa hududlarni ozod qilgan.
Shaharda qolgan rossiyalik askarlar soni 200 nafardan oshmasligi, ammo 500 ga yaqin tinch aholi “jonli qalqon” sifatida foydalanilayotgani vaziyatni murakkablashtirayotgani aytilmoqda. Rossiya mudofaa vazirligi esa Kupyansk yaqinidagi bir nechta aholi punktlari egallangani haqida xabar bergan, biroq Ukraina qurolli kuchlarining muvaffaqiyatlari yuzasidan izoh bermagan.
Shu bilan birga, Rossiya tomonidan ilgari e’lon qilingan Kupyansk “egallangani” haqidagi bayonotlar nafaqat ukrainaliklar, balki Rossiyadagi ayrim manbalar tomonidan ham shubha bilan qarshi olingan.
