Avstraliyaning Sidney shahridagi Bondi plyajida Xanuka bayrami nishonlanayotgan paytda otishma yuz berdi. Bu haqda Zamin.uz xabar berdi.
Ushbu hodisa natijasida 10 kishi halok bo‘ldi, jumladan, "Xabad" tashkiloti vakili, ravvin Eli Shlanger ham hayotdan ko‘z yumdi. Bu haqda The Jerusalem Post xabar berdi.
Otishma davomida Avstraliya Sionistlar Federatsiyasi vakillari ham jarohat oldi. Mahalliy huquq-tartibot organlari voqeadan so‘ng ikki kishini qo‘lga olganini ma’lum qildi.
Ayni vaqtda hodisa joyida maxsus operatsiya davom etmoqda. Politsiya mahalliy aholi va sayyohlardan bu hududga bormaslikni, xavfsizlik choralariga rioya qilishni qat’iy so‘radi.
Avstraliya Sionistlar Federatsiyasi prezidenti Jeremi Leyblerning aytishicha, mamlakat yahudiy jamoasi hodisadan hayratda. Unga ko‘ra, taxminan ikki ming kishi Bondi plyajiga Xanuka bayramini nishonlash va birinchi shamni yoqish uchun yig‘ilgan edi.
Yahudiy tashkilotlari vakillari hukumat bilan aloqada bo‘lib, jabrlanganlar va ularning oilalariga yordam ko‘rsatishga katta e’tibor qaratayotganliklarini bildirdi. Eslatib o‘tamiz, o‘tgan yilning noyabr oyida "Xabad" tashkilotining yana bir vakili, ravvin Svi Kogan o‘ldirilgan edi.
Ushbu jinoyatni Birlashgan Arab Amirliklarida yashagan Koganga qarshi O‘zbekiston fuqarolari sodir etgani aniqlangan.
