Braziliyaning Rio-Grande-do-Sul shtatidagi Guayba shaharchasida kuchli shamol oqibatida Ozodlik haykalining nusxasi qulab tushdi. Bu haqda Zamin.uz xabar berdi.
Hodisa mahalliy vaqt bilan kechasi sodir bo‘lgan. Mahalliy G1 portali tarqatgan videolarda bo‘ron paytida haykalning poydevori bilan birga tebranib, so‘ng yerga qulab tushgani aks etgan.
Mutaxassislar avvalroq hududda shamol tezligi 25 metr/soniyadan oshishi mumkinligi haqida ogohlantirish bergan edi. Afsuski, bashorat to‘g‘ri chiqdi.
Ma’lum qilinishicha, haykalning umumiy balandligi poydevori bilan birga 35 metrni tashkil qilgan. Qulagan qismi esa taxminan 24 metr bo‘lgan.
Eng e’tiborli jihati shundaki, hodisa oqibatida hech kim jarohat olmagan. Voqeadan so‘ng xavfsizlik choralarini kuchaytirish maqsadida hudud to‘liq o‘rab olingan.
Hozirda mahalliy hokimiyat voqeani o‘rganmoqda va haykalni qayta tiklash yoki butunlay demontaj qilish masalasida qaror qabul qilishni rejalashtirmoqda.
