O‘zbekiston elchixonasi migrantlarni qonuniy ishlashga chaqirdi
Vengriyadagi O‘zbekiston elchixonasining ma’lum qilishicha, Serbiya va Xorvatiyada ishlayotgan o‘zbek mehnat migrantlari tomonidan murojaatlar soni ortib bormoqda. Bu haqda Zamin.uz xabar berdi.
Asosiy muammolar qatoriga ish haqlarining o‘z vaqtida to‘lanmasligi yoki kechiktirilishi, ish uchun ruxsatnomalar olishdagi qiyinchiliklar kiradi. Ushbu holatlar ko‘pincha noqonuniy vositachilar orqali ishga joylashish bilan bog‘liq ekani qayd etilgan.
Mazkur davlatlarda ayrim migrantlar avvaldan to‘langan xizmatlar uchun qo‘shimcha haq talab qilinishi, rad etilganda esa deportatsiya bilan tahdid qilinishi yoki kutilmaganda ishdan bo‘shatilishi kabi muammolarga duch kelmoqda. Shu sababli elchixona fuqarolarga xorijda ishlash uchun faqat litsenziyaga ega bandlik agentliklari orqali murojaat qilishni qat’iy tavsiya etadi.
Shuningdek, turistik yoki mehmon vizalari orqali ishga chiqmaslik kerakligini eslatadi. Qoidabuzarliklar Shengen hududiga kirish uchun besh yilgacha taqiq qo‘yilishi va deportatsiyaga olib kelishi mumkin.
Elchixona fuqarolarga mehnat shartnomalarini imzolashdan oldin ularni sinchiklab o‘rganishni maslahat beradi. Muammolar yuzaga kelganda esa darhol konsullik bo‘limiga murojaat qilish lozim.
Diplomatik vakolatxona faqat qonuniy mehnat faoliyati orqali o‘zbek fuqarolarining huquq va manfaatlarini xorijda himoya qilish mumkinligini ta’kidlab o‘tgan.
