Prezident Mirziyoyev Yaponiyada rasmiy tashrifda bo‘lib turibdi
O‘zbekiston Prezidenti Shavkat Mirziyoyev rasmiy tashrif bilan Yaponiyaning Tokio shahrida bo‘lib turibdi. Bu haqda Zamin.uz xabar berdi.
Davlat rahbari Xaneda xalqaro aeroportida Yaponiya ichki ishlar va kommunikatsiyalar vaziri Yoshimasa Xayashi hamda boshqa rasmiylar tomonidan kutib olindi. Prezidentni Yaponiyada yashab, ishlayotgan va ta’lim olayotgan o‘zbekistonlik vatandoshlar ham iliq qarshi olishdi.
Davlat rahbari ular bilan ochiq muloqot o‘tkazdi. Suhbat davomida O‘zbekistonda olib borilayotgan islohotlar, mamlakatning rivojlanish yo‘nalishlari, shuningdek, chet elda yashayotgan fuqarolarning rejalari va maqsadlari yuzasidan fikr almashildi.
Prezident Shavkat Mirziyoyevning ushbu tashrifi davomida muhim tadbirlar 19–20 dekabr kunlari rejalashtirilgan. Ular doirasida Yaponiya imperatori Naruxito, bosh vazir Sanae Takaichi, yapon ishbilarmonlari va ilmiy doiralar vakillari bilan uchrashuvlar o‘tkazilishi ko‘zda tutilgan.
Shuningdek, davlat rahbari "Markaziy Osiyo + Yaponiya" muloqotining birinchi sammitida ishtirok etishi kutilmoqda.
