Zelenskiy: Rossiya aktivlari Ukrainaga yo‘naltirilishi shart
Ukraina Prezidenti Volodimir Zelenskiy G‘arb davlatlarini Kremlga nisbatan yanada kuchliroq bosim o‘tkazishga chaqirmoqda. Bu haqda Zamin.uz xabar berdi.
Uning fikricha, Rossiya muzlatilgan aktivlaridan foydalanish masalasida qat’iy qaror qabul qilinmas ekan, Vladimir Putin tinchlik muzokaralari stoliga o‘tirmaydi. Zelenskiy bu fikrni 18-dekabr kuni Bryusselda bo‘lib o‘tgan Yevropa Ittifoqi sammiti oldidan jurnalistlarga bergan intervyusida bildirdi.
Prezidentning ta’kidlashicha, Ukrainaga moliyaviy va harbiy yordam ko‘rsatilmasligi mamlakatning pozitsiyasini zaiflashtiradi. Ukraina rahbari Rossiyaning muzlatilgan aktivlarini Ukrainaga yo‘naltirishni asosiy siyosiy qurol deb atadi.
Unga ko‘ra, Putin hozircha muloqotga tayyor emas, chunki Ukrainani harbiy va iqtisodiy jihatdan zaiflashtirishga urinmoqda. Zelenskiy urushni diplomatik yo‘l bilan tugatish uchun barcha imkoniyatlarni ishga solayotganini qayd etib, mudofaa uchun moliyaviy yordam va qurol-yarog‘ hayotiy ahamiyatga ega ekanini ta’kidladi.
Sammitda Rossiyaning muzlatilgan aktivlaridan foydalanish bo‘yicha bir nechta muhim masalalar ko‘rib chiqildi. Jumladan, aktivlarni Ukrainaga yo‘naltirishga oid murakkab kredit sxemasi, mablag‘larni urush tugagunga qadar qaytarishni taqiqlash va doimiy sanksiyalar tizimini joriy etish.
Yevropa davlatlari Rossiya aktivlarini muzlatish muddatini cheklanmagan vaqtga uzaytirishni ko‘zlamoqda. Shuningdek, Zelenskiy 19–20-dekabr kunlari Floridada AQSH va Ukraina delegatsiyalari o‘rtasida muhim muzokaralar o‘tkazilishini tasdiqladi.
Unda AQSHning tinchlik rejasi, Ukrainaga xavfsizlik kafolatlari va urushdan keyingi tiklanish loyihalari muhokama etilishi kutilmoqda. Bu orada Rossiya Yevropa Ittifoqi tizimlariga qarshi huquqiy da’volar kiritayotgan bir paytda, Yevropa davlatlari Ukrainaga barqaror kreditlar taqdim etish uchun Rossiya aktivlarini muzlatish jarayonini davom ettirishga tayyor.
