Rio-de-Janeyrodagi reydda 121 kishi halok bo‘ldi
Braziliyaning Rio-de-Janeyro shahrida politsiya tomonidan amalga oshirilgan yirik reyd og‘ir oqibatlarga olib keldi. Bu haqda Zamin.uz xabar berdi.
28-oktyabr kuni Penya va Alemao hududlarida o‘tkazilgan amaliyot davomida kamida 121 kishi halok bo‘ldi, ularning orasida bir necha nafar politsiya xodimlari ham bor edi. Mazkur reyd jinoiy guruh yetakchilarini qo‘lga olish maqsadida rejalashtirilgan.
Ammo amaliyot boshlanishidan oldin bu haqda ma’lumot tarqalib ketgani sababli qurollangan shaxslar qarshilik ko‘rsatgan. Natijada uzoq davom etgan otishmalar yuz bergan va bu hududda hayot deyarli to‘xtab qolgan.
Reyd vaqtida maktablar yopilib, transport qatnovi cheklangan, mahalliy aholi esa xavfsizlik sababli o‘z uylarida yashirinishga majbur bo‘lgan. Ayrim hududlarda mashinalar yoqib yuborilgan, ko‘chalarda esa o‘q izlari kuzatilgan.
Hukumat ushbu reydni muvaffaqiyatli deb baholagan bo‘lsa-da, huquq himoyachilari va mahalliy aholi qurbonlar sonining haddan tashqari ko‘pligini ta’kidlamoqda. Ular voqea yuzasidan ochiq va adolatli tekshiruv olib borilishini talab qilmoqda.
