Qora dengizda yuzlab delfinlar nobud bo‘lmoqda. Bu haqda Zamin.uz xabar berdi.
Krasnodar o‘lkasi qirg‘oqlarida yuzlab delfinlar jasadi topilgan. Rasmiy ma’lumotlarga ko‘ra, bu ekologik falokatning asosiy sababi neft to‘kilishi bo‘lgan.
Hisobotlarga ko‘ra, neft to‘kilishi oqibatida 688 ta delfin nobud bo‘lgan. Delfinlar o‘limi ayniqsa neft to‘kilishidan keyingi dastlabki oyda keskin ko‘paygan.
Mutaxassislarning ta’kidlashicha, bu ekologik muammo uzoq muddat davomida o‘z ta’sirini ko‘rsatishi mumkin. Tadqiqotlarga ko‘ra, neftning suvga to‘kilishi natijasida toksinlar organizmlarda to‘planib, turli kasalliklarning ko‘payishiga olib keladi.
Bu esa delfinlar va boshqa dengiz hayvonlarining o‘lim darajasini oshiradi, shuningdek, ularning ko‘payishiga ham salbiy ta’sir ko‘rsatadi. O‘lim holatlari ayniqsa oktyabr oxiri va noyabr oylarida, kit va delfinlarning quruqlikka chiqish davrida ko‘proq kuzatilgan.
2024-yil 15-dekabr kuni “Volgoneft-212” va “Volgoneft-239” tankerlari Kerch bo‘g‘ozida bo‘ron sababli halokatga uchragan. Ushbu tankerlar jami 9,2 ming tonna qora neft tashigan bo‘lib, ulardan 2,4 ming tonnasi suvga to‘kilgan.
Ushbu holat Rossiyada katta ekologik falokat sifatida baholanib, favqulodda vaziyat e’lon qilingan. Rossiya Tabiiy resurslar vazirligi ma’lumotiga ko‘ra, qora neft bilan ifloslangan Anapa plyajlarini to‘liq tiklash ishlari 2026-yil yozigacha davom etadi.
Mutaxassislar bu hududda ekologik muhitni tiklash uchun ko‘p vaqt va sa’y-harakat talab etilishini ta’kidlashmoqda.
