Yevropa Rossiya bilan muloqotni qayta tiklashni istamoqda
Yevropa davlatlarida Rossiya prezidenti Vladimir Putinni chetlab o‘tish strategiyasi o‘zini oqlamayotgani haqidagi fikrlar tobora kuchaymoqda. Bu haqda Zamin.uz xabar berdi.
Britaniyalik tahlilchi Mark Galeotti The Spectator nashrida e’lon qilgan maqolasida bu mavzuga alohida e’tibor qaratgan. Galeottining fikriga ko‘ra, Fransiya prezidenti Emmanuel Makronning Putin bilan to‘g‘ridan to‘g‘ri muloqot qilish zarurligi haqidagi qarashi mantiqiy.
Chunki Rossiyani butunlay inkor etish yoki uni e’tiborsiz qoldirish Yevropa uchun samara bermayapti. Bunday yondashuv na siyosiy, na iqtisodiy jihatdan foydali bo‘layotgani ko‘rinmoqda.
Tahlilchi ta’kidlaganidek, Putin alohida davlat rahbarlari bilan uchrashuvlarga unchalik qiziqmaydi. Ammo Yevropa Ittifoqi mamlakatlari birgalikda harakat qilsa, Moskva e’tiborini tortishi mumkin.
Shuningdek, Yevropada Putinni faqat "yomon shaxs" sifatida ko‘rish va uni chetlash g‘oyasi asta-sekin o‘z dolzarbligini yo‘qotmoqda. Yevropa boshqa murakkab davlatlar bilan muzokaralar o‘tkazayotgani bois, Rossiya bilan muloqotdan bosh tortish ikkiyuzlamachilik sifatida baholanmoqda.
Muallif Finlyandiyaning sobiq prezidenti Sauli Niinistyoning fikriga ham murojaat qiladi. U Yevropa yetakchilari AQSHda yuz berayotgan siyosiy o‘zgarishlar sababli Rossiya bilan aloqalar uzilib qolmasligi uchun tashabbusni o‘z qo‘liga olishi kerakligini ta’kidlagan.
Amaldagi Finlyandiya prezidenti Aleksandr Stubb esa bu tashabbusning faqat jamoaviy formatda amalga oshirilishini qo‘llab-quvvatlagan. Galeotti Yevropaning yagona pozitsiyada bo‘lishi muhimligini alohida qayd etadi.
Unga ko‘ra, Buyuk Britaniya, Fransiya va Germaniyadan iborat "Ye3" hamkorligi Rossiya bilan siyosiy muloqot boshlashda hal qiluvchi rol o‘ynashi mumkin. Bu muzokaralar darhol natija bermasligi mumkin, ammo uzoq muddatli munosabatlarni qayta tiklash uchun muhim poydevor yaratadi.
Muallif so‘zining yakunida bir diplomatning fikrini keltiradi: Rossiya hech qayerga yo‘qolib qolmaydi, shuning uchun Yevropa nafaqat urushni hal qilish, balki tinchlik uchun mustahkam asos yaratishi kerak. Hozircha Putin Yevropa davlatlarining pozitsiyasiga e’tibor bermayotgan bo‘lsa-da, bu vaziyat abadiy davom etmasligi mumkin.
