General-leytenant Igor Kirillovning o‘limi bilan bog‘liq jinoyat ishi bo‘yicha yangi qarorlar e’lon qilindi. Bu haqda Zamin.uz xabar berdi.
Moskva shahridagi Basmanniy sudi ushbu ish doirasida o‘zbekistonlik Saidakbar G‘ulomov va Mirjalol Odilovni sirtdan hibsga olish haqida qaror chiqarganini bildirdi. Shuningdek, sud ukrainalik Andrey Gedzikka nisbatan ham xuddi shunday qaror qabul qilgan.
Ularning barchasi xalqaro qidiruvga berilgan bo‘lib, hozircha ularning qayerda ekani aniqlanmagan. Tergov ma’lumotlariga ko‘ra, general Kirillovning o‘limiga aloqador ishda yana to‘rt nafar shaxs gumonlanmoqda.
Ular orasida o‘zbekistonlik Ahmad Qurbonov ham bor. Rossiya huquq-tartibot idoralari Qurbonovni generalning hayotiga zomin bo‘lgan terrorchilik harakatini amalga oshirgan shaxs sifatida ko‘rsatmoqda.
Qurbonov tergov davomida ko‘rsatma berib, uni Ukraina maxsus xizmatlari yollaganini aytgan. Unga ko‘ra, bu jinoyatni amalga oshirish evaziga unga 100 ming AQSH dollari va Yevropa Ittifoqiga chiqishda yordam va’da qilingan.
Tergov davomida Ahmad Qurbonovning jinoyatdan oldin Qozon shahrida yashagani hamda Moskvadagi choyxonalardan birida ishlagani aniqlangan. Ma’lum bo‘lishicha, general-leytenant Igor Kirillov 2024 yil oxirida qo‘lbola portlovchi qurilma portlashi natijasida halok bo‘lgan.
Ushbu voqea vaqtida uning yordamchisi Ilya Polikarpov ham hayotdan ko‘z yumgan. Mazkur jinoyat ishi xalqaro tus olib, bir nechta davlat fuqarolarining ishtiroki qayd etilayotgani uni yanada murakkablashtirmoqda.
Tergovning keyingi bosqichida gumonlanuvchilarni qachon va qayerda qo‘lga olish masalasi asosiy savol bo‘lib qolmoqda.
