Entoni Joshua Nigeriyada YTHga uchradi, sog‘lig‘i barqaror

Sobiq jahon chempioni, britaniyalik bokschi Entoni Joshua Nigeriyada yo‘l-transport hodisasiga uchradi. Bu haqda Zamin.uz xabar berdi.

Mahalliy huquqni muhofaza qiluvchi organlar va xalqaro ommaviy axborot vositalarining xabar berishicha, voqea 29-dekabr kuni Ogun shtati hududidan o‘tuvchi Lagos–Ibadan avtomobil yo‘lida sodir bo‘lgan. Ma’lum qilinishicha, Joshua o‘tirgan avtomobil yo‘l chetida to‘xtab turgan yuk mashinasi bilan to‘qnashgan.

Ushbu hodisa oqibatida kamida ikki kishi halok bo‘lgani aytilmoqda. Hozirda hodisaning sabablari o‘rganilmoqda, tegishli idoralar tomonidan tergov ishlari olib borilmoqda.

Bokschining o‘zi bu voqea natijasida yengil tan jarohatlari olgan. U ehtiyotkorlik yuzasidan shifoxonaga yetkazilib, to‘liq tibbiy ko‘rikdan o‘tkazilgan.

Shifokorlarning ma’lum qilishicha, sportchining hayotiga hech qanday xavf yo‘q. Joshuaning vakillari ham uning holati barqaror ekanini va u shifokorlar nazorati ostida ekanini tasdiqladi.

Ma’lum bo‘lishicha, Joshua so‘nggi kunlarda shaxsiy tashrif bilan Nigeriyada bo‘lib turgan. Bokschi o‘zining oilaviy ildizlari bog‘liq bo‘lgan ushbu mamlakatga tez-tez tashrif buyurib turadi.

Hozircha voqeaning kelib chiqish sabablari va ehtimoliy huquqiy oqibatlari haqida qo‘shimcha ma’lumot berilmadi. Eslatib o‘tamiz, Entoni Joshua Buyuk Britaniyaning eng mashhur professional bokschilaridan biridir.

U 1989-yil 15-oktyabrda Uotford shahrida tug‘ilgan. 2012-yilda London Olimpiadasida oltin medalni qo‘lga kiritgan.

Faoliyati davomida WBA, IBF, WBO va IBO yo‘nalishlari bo‘yicha jahon chempioni unvonlariga ega chiqqan. 2025-yilda bir yillik tanaffusdan so‘ng ringga qaytgan Joshua 19-dekabr kuni Jeyk Polni oltinchi raundda nokaut bilan mag‘lub etgan edi.

Hozirda sportchining muxlislari uning sog‘lig‘i joyida ekanidan va faoliyatini davom ettirishiga hech qanday to‘siq yo‘qligidan xotirjam.