Germaniyada banklarga qator yirik o‘g‘irliklar sodir bo‘ldi

Germaniyada so‘nggi kunlarda banklarga qarshi qator o‘g‘irliklar sodir etildi. Bu haqda Zamin.uz xabar berdi.

Shimoliy Reyn-Vestfaliya hududida uchinchi marta banklar nishonga olindi. 30-dekabr kuni Galle shahridagi temiryo‘l vokzali yaqinidagi Sparkasse banki bo‘limida to‘rtta seyf yacheykasi buzib ochilgani aniqlandi.

Politsiya ushbu holat yuzasidan tergovni davom ettirmoqda, ammo jinoyatchilarning bankka qanday kirgani va qaysi usuldan foydalangani hali noma’lum. Voqea bo‘yicha guvohlik bera oladigan shaxslarning ma'lumotlari muhim ahamiyat kasb etmoqda.

Bundan avvalroq, 17-dekabr kuni Bonndagi Sparkasse bankining markaziy bo‘limidan oltin va boshqa qimmatbaho buyumlar o‘g‘irlangani haqida xabar qilingan edi. Ushbu jinoyatda sobiq bank xodimi gumon qilingan, ammo dalillar yetarli bo‘lmagani sababli u qo‘yib yuborilgan.

29-dekabrda esa Gelzenkirxendagi Sparkasse bankida yana bir o‘g‘irlik sodir bo‘ldi. Bank xavfsizlik xizmati ma’lumotiga ko‘ra, taxminan 3200 ta seyf yacheykasi buzib ochilgan.

Jinoyatchilar bankning yonidagi avtoturargohdan kirib, beton devorni teshib o‘tgan. Bu holat Germaniya tarixidagi eng yirik o‘g‘irliklardan biri sifatida qayd etilishi mumkin.

Hozirda politsiya jinoyatchilarni aniqlash ustida ish olib bormoqda, ammo jiddiy dalillar topilgani yo‘q. Xalqaro jinoyatchilar tomonidan Germaniyadagi qimmatbaho boyliklarga qilingan hujumlar xavotir uyg‘otmoqda.

Ushbu voqealar mamlakatda bank xavfsizligini kuchaytirish masalasini kun tartibiga chiqarmoqda.