Germaniyada bankdan 100 million yevro o‘g‘irlandi
Germaniyaning Gelzenkirxen shahrida joylashgan Sparkasse banki filialida sodir bo‘lgan o‘g‘rilik mamlakat tarixidagi eng yirik jinoyatlardan biri sifatida qayd etildi. Bu haqda Zamin.uz xabar berdi.
Jinoyatchilar bankdan 100 million yevrodan ortiq mablag‘ni o‘g‘irlashga muvaffaq bo‘lgan. Bu haqda 2-yanvar kuni nemis matbuoti Bild gazetasi xabar berdi.
Dastlab zarar miqdori 10 milliondan 90 million yevrogacha baholangan edi. Keyinchalik bu summa yanada yuqori bo‘lgani aniqlandi.
Bild xabariga ko‘ra, bankda 3250 ta maxsus saqlash yacheykasi mavjud bo‘lgan bo‘lib, ularning 90 foizi o‘g‘rilar tomonidan buzib ochilgan. Har bir yacheyka o‘rtacha 10 300 yevro miqdorida sug‘urtalangan edi.
Jinoyatchilar bank omboriga kirish uchun yacheykalar joylashgan xonaga tutash avtoturargoh devorini teshib o‘tgan. 29-dekabr kuni bank binosi oldida yig‘ilgan mijozlar o‘z noroziliklarini bildirishdi.
Ularning aksariyati sug‘urta qoplaydigan mablag‘ yo‘qotilgan pullarning faqat bir qismini qoplashini ta’kidlashdi. Hozirga qadar jinoyatchilar qo‘lga olinmagan.
Tergov ishlari davom etmoqda. Ma’lum bo‘lishicha, Germaniyaning boshqa hududlarida, xususan, Galle va Bonn shaharlaridagi banklarda ham shunga o‘xshash o‘g‘irliklar sodir bo‘lgan.
Jinoyatchilarning bu kabi o‘g‘riliklarni rejalashtirib amalga oshirgani huquq-tartibot organlari e’tiborini kuchaytirdi. Ushbu hodisalar Germaniya jamiyatida katta shov-shuvga sabab bo‘lib, bank xavfsizligi va sug‘urta tizimiga oid savollarni yana bir bor kun tartibiga olib chiqdi.
