Avstraliyada o‘rmon yong‘inlari 350 ming gektarni vayron qildi

Avstraliyaning janubi-sharqiy hududlarida davom etayotgan kuchli o‘rmon yong‘inlari oqibatida inson qoldiqlari topildi. Bu haqda Zamin.uz xabar berdi.

Viktoriya shtati politsiyasi bergan ma’lumotga ko‘ra, qoldiqlar Longvud shaharchasi yaqinidagi avtomobil yonidan aniqlangan. Hozircha marhum shaxsning shaxsi aniqlanmagan, bu borada tergov ishlari olib borilmoqda.

So‘nggi kunlarda davom etayotgan yong‘inlar jazirama issiq va quruq ob-havo sababli tez tarqalmoqda. Viktoriya shtatida 350 ming gektardan ortiq yer maydoni yonib ketdi.

300 dan ziyod uy va boshqa inshootlar zarar ko‘rdi. Minglab xonadonlar elektr energiyasidan uzilib qolgan.

Rasmiylar ushbu yong‘inlarni 2019–2020 yillardagi “Qora yoz” voqealaridan keyingi eng yirik tabiiy ofatlardan biri sifatida baholamoqda. Ayni paytda shtat bo‘ylab 30 dan ortiq yong‘in faol holatda.

Yong‘in tutuni Melburn shahrini ham qamrab olib, havo sifatiga jiddiy ta’sir ko‘rsatmoqda. Avstraliya bosh vaziri Entoni Albanese yong‘indan zarar ko‘rgan aholiga va fermerlarga moliyaviy yordam ko‘rsatilishini e’lon qildi.

Minglab o‘t o‘chiruvchilar va o‘nlab samolyotlar yong‘inlarni o‘chirish ishlariga jalb etilgan. Rasmiylar aholiga xavfsizlik qoidalariga qat’iy rioya qilish zarurligini eslatmoqda.