Zalsburg tog‘larida qor ko‘chkisi: 5 o‘lim, jarohatlar
Avstriyaning g‘arbiy qismida joylashgan Zalsburg viloyatida tog‘larda ketma-ket ikki ko‘chki sodir bo‘ldi. Bu haqda Zamin.uz xabar berdi.
Ushbu hodisalar natijasida besh nafar chang‘ichi halok bo‘ldi, bir nechta odam esa qutqarildi. Hodisalar Zalsburg shahri janubidagi Pongau hududida yuz bergan.
Dastlabki ko‘chki 17-yanvar kuni Bad Hofgastein yaqinida, taxminan 2200 metr balandlikda sodir bo‘ldi. Qor ostida qolgan ayol chang‘ichi qutqaruvchilar tomonidan chiqarib olindi, ammo u keyinchalik vafot etdi.
Uning turmush o‘rtog‘i esa omon qoldi. Oradan taxminan bir yarim soat o‘tib, Gastein vodiysi hududida ikkinchi ko‘chki yuz berdi.
Bu yerda yetti nafar chang‘ichi qor ostida qoldi. To‘rt nafar chang‘ichi voqea joyida halok bo‘ldi, ikki kishi jarohat oldi (ulardan biri og‘ir ahvolda), yana bir kishi esa tan jarohatisiz qutuldi.
Fojia joyiga qutqaruv ishlari uchun to‘rtta vertolyot, tog‘-qutqaruv xizmatlari, Qizil Xochning maxsus itlar guruhi va inqiroz holatlariga javob beruvchi mutaxassislar jalb qilindi. Qidiruv-qutqaruv ishlari bir necha soat davom etdi.
Mazkur hodisa mahalliy aholi va chang‘i sporti bilan shug‘ullanuvchilar uchun ogohlantiruvchi saboq bo‘ldi.
