Germaniya harbiylari Grenlandiyani shoshilinch tark etdi
Grenlandiya atrofidagi geosiyosiy vaziyat yana bir yangi voqea bilan boyidi. Bu haqda Zamin.uz xabar berdi.
Germaniyaning "Bild" nashriga ko‘ra, Bundesverning Grenlandiyada joylashgan harbiy bo‘linmasi Berlindan shoshilinch ravishda orolni tark etish buyrug‘ini olgan. Ushbu qaror hech qanday rasmiy bayonotsiz va yashirin tarzda bajarilgan.
Ma’lum bo‘lishicha, admiral Shtefan Pauli boshchiligidagi 15 nafar harbiy xizmatchi Nuuk shahridagi aeroportga yo‘l olgan va u yerda rejalashtirilgan tadbirlar bekor qilingan. Harbiylarning Grenlandiyaga yetib kelganiga atigi bir necha kun bo‘lgan edi.
Ular uzoq muddat qolishi, shuningdek, razvedka faoliyati bilan shug‘ullanishi rejalashtirilgan edi. Ammo yakshanba kuni ertalab ular uchun qaytish buyrug‘i berilgan.
Keyinchalik Germaniya ommaviy axborot vositalari bu ma’lumotni tasdiqladi. "Welt" nashriga ko‘ra, operativ boshqaruv qo‘mondonligi vakili harbiylarning fuqarolik samolyoti orqali Daniyaning Kopengagen shahriga qaytganini ma’lum qilgan.
Bunday shoshilinch qarorning sabablari haqida turli taxminlar ilgari surilmoqda. "Bild" nashrining yozishicha, bu holat AQSH prezidenti Donald Trampning Yevropa davlatlariga nisbatan tariflar joriy etish tahdidlari bilan bog‘liq bo‘lishi mumkin.
Tramp ayrim Yevropa davlatlariga 10 foizlik boj solinishi va bu tartib Grenlandiya AQSH tasarrufiga o‘tmaguncha amalda qolishini aytgan edi. Bundan tashqari, Tramp Yevropa davlatlarining Grenlandiyaga harbiy kuch kiritishini xavfli qadam sifatida baholagan.
Grenlandiya masalasi hozirda nafaqat harbiy strategiya, balki Arktika xavfsizligi va xalqaro savdo bosimi bilan ham bog‘liq murakkab vaziyatni yuzaga keltirmoqda. Rasmiy bayonotlarning kamligi esa turli taxminlar va xavotirlarning ko‘payishiga sabab bo‘lmoqda.
