Yevropa AQSh tariflariga javoban choralar ko‘rishi mumkin
Yevropa Ittifoqiga a’zo bir qator davlatlar AQSh prezidenti Donald Trampning Yevropa mamlakatlariga nisbatan bojxona tariflarini oshirish haqidagi bayonotlarini keskin tanqid qildi. Bu haqda Zamin.uz xabar berdi.
Yevropa yetakchilari bu kabi tahdidlar davlatlararo munosabatlarga salbiy ta’sir ko‘rsatishi va bosim o‘tkazish vositasi sifatida qabul qilinishini ta’kidladi. AQSh rasmiylari Grenlandiya bilan bog‘liq masala sababli Daniya, Fransiya, Germaniya, Shvetsiya, Niderlandiya, Finlyandiya, shuningdek Buyuk Britaniya va Norvegiyaga qarshi yangi tariflar joriy etilishini e’lon qildi.
Yevropa davlatlari esa Grenlandiyaga yuborilgan harbiy kuchlar faqat xavfsizlikni ta’minlashga qaratilganini va hech bir davlatga tahdid solmasligini ma’lum qildi. Mazkur vaziyat yuzasidan Bryusselda Yevropa Ittifoqiga a’zo davlatlarning favqulodda yig‘ilishi o‘tkazildi.
Ayrim davlatlar AQShning bosimlariga javoban iqtisodiy choralar ko‘rishni taklif qilmoqda. Bu masala hozirda Yevropa doirasida muhokama qilinmoqda.
Yevropa yetakchilari muammoni muloqot orqali hal qilish tarafdori ekanini bildirdi. Shu bilan birga, agar AQSh tomonidan bosim davom etsa, Yevropa Ittifoqi o‘z manfaatlarini himoya qilish uchun zarur javob choralarini ko‘rishga tayyor ekanini ta’kidladi.
