Chilida o‘rmon yong‘inlari 19 kishini hayotdan olib ketdi
Chilining markaziy va janubiy hududlarida sodir bo‘lgan o‘rmon yong‘inlari oqibatida kamida 19 kishi halok bo‘ldi. Bu haqda Zamin.uz xabar berdi.
Yong‘inlar kuchli issiqlik va shamol tufayli tez tarqalmoqda. Hukumat xavfli hududlarda yashovchi aholini xavfsiz joylarga evakuatsiya qilish choralarini ko‘rmoqda.
Mamlakat bo‘ylab 23 ta faol yong‘in qayd etilgan bo‘lib, eng yirik yong‘inlar Ñuble va Bio-Bio hududlarida ro‘y bermoqda. Ushbu hududlarda favqulodda holat e’lon qilingan.
Ba’zi yong‘inlar aholi yashaydigan hududlarga yaqinlashib, uy-joylarga jiddiy zarar yetkazgan. Rasmiy ma’lumotlarga ko‘ra, hozirgi kungacha 20 ming gektardan ortiq maydon yonib ketgan.
Ayniqsa, Konsepsion shahri yaqinidagi yong‘in eng katta deb baholanmoqda. Bir necha shaharchalar aholisi o‘z uylarini tark etishga majbur bo‘lgan.
Mutaxassislarning ta’kidlashicha, havo harorati yaqin kunlarda yanada ko‘tarilishi kutilmoqda. Bu esa yangi xavf-xatarlarni keltirib chiqarishi mumkin.
Rasmiylar aholidan ehtiyot choralariga qat’iy rioya qilishni so‘ramoqda. Yong‘inlarni nazoratga olish uchun barcha kuchlar safarbar etilgan.
