O‘zbekiston AQShda uchta yangi konsullik ochadi
O‘zbekiston Amerika Qo‘shma Shtatlaridagi diplomatik faoliyatini kengaytirish va xalqaro havo qatnovlari yo‘nalishlarini ko‘paytirishni rejalashtirmoqda. Bu haqda Zamin.uz xabar berdi.
Mamlakatning amaldagi elchixona va konsulliklariga qo‘shimcha ravishda, AQShda uchta yangi konsullik ochilishi kutilmoqda. Bundan tashqari, havo qatnovlari geografiyasi Kaliforniya va Florida shtatlari tomon kengayishi mumkin.
Bu haqda O‘zbekistonning AQShdagi elchisi Furqat Sidikov tadbirkorlar bilan uchrashuvda ma’lum qildi. Elchining so‘zlariga ko‘ra, hozirgacha O‘zbekiston manfaatlarini asosan Vashingtondagi elchixona va Nyu-Yorkdagi bosh konsullik ifodalab kelgan.
Endilikda Chikago, San-Fransisko va Vashington shtatida yangi konsulliklar ochilishi rejalashtirilmoqda. Ushbu qadam AQSh fuqarolari uchun 2026 yildan boshlab O‘zbekistonga vizasiz kirish tartibi joriy etilishi fonida amalga oshirilmoqda.
Shuningdek, elchi O‘zbekiston mintaqada AQSh bilan to‘g‘ridan-to‘g‘ri aviaqatnovga ega yagona aviatsiya markazi bo‘lib qolayotganini ta’kidladi. Hozirgi kunda Nyu-York yo‘nalishida haftasiga beshta reys amalga oshirilmoqda.
Kelgusida esa Kaliforniya yoki Florida tomon to‘g‘ridan-to‘g‘ri parvozlar yo‘lga qo‘yilishi muhokama qilinmoqda. Furqat Sidikov AQShda O‘zbekistonni targ‘ib qilish bo‘yicha hozirgi yondashuvlarni tanqid qilib, ko‘plab materiallarni “shablon” deb baholadi.
U turizm sohasida aniq auditoriyaga mos xizmat va mahsulotlarni ishlab chiqishni tavsiya etdi. Yangi targ‘ibot strategiyasi doirasida O‘zbekiston National Geographic telekanali bilan hamkorlikni boshladi.
Telekanal ijodiy guruhi mamlakatga kelib, hujjatli serial suratga olishi rejalashtirilgan. Ushbu loyiha xalqaro auditoriyaga O‘zbekistonning turistik brendini tanishtirishga qaratiladi.
Elchi, shuningdek, mablag‘larni rasmiy tadbirlarga emas, balki kuchli marketing va nufuzli global blogerlarni jalb etishga yo‘naltirish zarurligini ta’kidladi. Bundan tashqari, O‘zbekiston AQSh bilan fuqarolari uchun viza olish tartibini soddalashtirish bo‘yicha muzokaralar olib borayotgani ma’lum qilindi.
Ushbu jarayon uzoq davom etishi va ko‘p jihatdan AQSh tomonining qarorlariga bog‘liqligi qayd etildi.
