Niderlandiyada skottish va sfinks mushuklari taqiqlandi

Niderlandiyada Scottish Fold (skottish) va sfinks zotli mushuklarni ko‘paytirish, sotish yoki mamlakatga olib kirish qat’iyan taqiqlanadi. Bu haqda Zamin.uz xabar berdi.

Bu haqda "The Nation" xabar berdi. Ushbu qaror mazkur zotlarning tashqi ko‘rinishi bilan bog‘liq bo‘lgan jiddiy genetik muammolar sabab qabul qilingan.

Qayd etilishicha, bu choralar hayvonlarning farovonligini oshirishga qaratilgan kengroq siyosatning bir qismi hisoblanadi. Mutaxassislarning ta’kidlashicha, skottish mushuklarining qayrilgan quloq shakli genetik mutatsiya natijasi bo‘lib, bu tog‘ay va bo‘g‘imlarda turli nuqsonlarni keltirib chiqaradi.

Natijada mushuklarda artrit, doimiy og‘riq, shuningdek, dum va umurtqa bilan bog‘liq muammolar kuzatilishi mumkin. Sfinks zotidagi mushuklarda esa junning yo‘qligi ularning tana haroratini me’yorida saqlashni qiyinlashtiradi.

Bu esa teri kasalliklari va infeksiyalarga moyillikni oshiradi. Mazkur qarorni Niderlandiya veterinarlari assotsiatsiyasi hamda Yevropa veterinariya shifokorlari uyushmasi qo‘llab-quvvatlagan.

Shuningdek, bu zotdagi mushuklarni har qanday tanlov yoki ko‘rgazmalarda namoyish qilish taqiqlangan, istisno holatlar ko‘zda tutilmagan. Qoidalarni buzgan shaxslar 1500 yevro miqdorida jarimaga tortiladi.

Bundan tashqari, chiplangan mushuklar o‘z egasining qaramog‘ida umrining oxirigacha qoladi.