Moskvadagi terakt ishi bo‘yicha Qurbonovga umrbod qamoq jazosi berildi
Moskvadagi harbiy sud Rossiya Qurolli kuchlarining radiatsiyaviy, kimyoviy va biologik himoya qo‘shinlari boshlig‘i general-leytenant Igor Kirillov va uning yordamchisi Ilya Polikarpovning halok bo‘lishi bilan bog‘liq terakt ishi yuzasidan Ahmadjon Qurbonovga umrbod qamoq jazosi tayinladi. Bu haqda Zamin.uz xabar berdi.
Sud qaroriga ko‘ra, Qurbonov dastlabki 10 yilni qamoqxona sharoitida, qolgan muddatni esa maxsus tartibli koloniyada o‘taydi. Shuningdek, unga 1 million rubl miqdorida jarima ham belgilangan.
Tergov xulosasida Qurbonov teraktning bevosita ijrochisi sifatida ko‘rsatilgan. Mazkur ish bo‘yicha yana uch nafar shaxsga ham hukm chiqarildi.
Botuxon Tochiyev 22 yil, Ramazon Padiyev 18 yil, Robert Safaryan esa 25 yilga ozodlikdan mahrum qilindi. Qurbonov sudda aybini to‘liq tan olgan va pushaymonligini bildirgan.
Safaryan aybni qisman tan olgan bo‘lsa, Padiyev va Tochiyev ayblovlarni rad etgan. Tergov materiallariga ko‘ra, 2024 yilning 17 dekabr kuni ertalab Moskvada general yashagan uy yonida joylashtirilgan portlovchi qurilma ishga tushirilgan.
Qurilma elektrosamokat ichiga joylashtirilgan bo‘lib, portlash natijasida Igor Kirillov va Ilya Polikarpov halok bo‘lgan. Qurbonov voqeadan bir necha soat o‘tib qo‘lga olingan.
U so‘roq paytida Ukraina maxsus xizmatlari tomonidan yollangani, jinoyat uchun 100 ming dollar va Yevropaga chiqib ketish imkoniyati va’da qilinganini aytgan. Tergovga ko‘ra, Tochiyev va Padiyev Qurbonov uchun Moskva viloyatidagi xosteldan xona ijaralab bergan va u teraktdan keyin o‘sha yerda yashirinishni rejalashtirgan.
Ushbu ish Rossiyada yuqori lavozimli harbiy amaldorlarning o‘limi bilan bog‘liq eng katta e’tibor qozongan jinoyat ishlardan biri sifatida ko‘rilmoqda. Endilikda ish bo‘yicha apellyatsiya jarayonlari bo‘ladimi-yo‘qmi, yaqin kunlarda ma’lum bo‘ladi.
