Tramp Grenlandiya masalasi sabab savdo bojini bekor qildi

AQSh prezidenti Donald Tramp Grenlandiya bilan bog‘liq vaziyat sabab Yevropa davlatlariga nisbatan savdo bojlarini joriy etish rejasidan voz kechdi. Bu haqda Zamin.uz xabar berdi.

Ushbu qaror Davos shahrida o‘tkazilgan Jahon iqtisodiy forumi doirasida NATO bosh kotibi Mark Ryutte bilan bo‘lib o‘tgan uchrashuvdan so‘ng qabul qilindi. Trampning so‘zlariga ko‘ra, tomonlar Grenlandiya va butun Arktika mintaqasida kelgusidagi hamkorlik bo‘yicha umumiy yondashuv va kelishuv asoslarini ishlab chiqishga erishgan.

U shuningdek, bu qaror Qo‘shma Shtatlar va NATOga a’zo mamlakatlar uchun ijobiy natijalar keltirishini ta’kidladi. Shu sabab, 1-fevraldan kuchga kirishi rejalashtirilgan savdo bojlarini bekor qilishga qaror qilganini ma’lum qildi.

Eslatib o‘tamiz, avvalroq Donald Tramp fevral oyidan boshlab Daniya, Buyuk Britaniya, Norvegiya, Shvetsiya, Fransiya, Germaniya, Niderlandiya va Finlyandiyadan AQShga olib kiriladigan mahsulotlarga 10 foizlik savdo boji joriy etilishi mumkinligini bildirgan edi. Bu qaror esa Grenlandiya masalasidagi muzokaralar natijasida bekor qilindi.