Tramp Grenlandiyani sotib olishni taklif qilgan
The Daily Mail xabariga ko‘ra, AQSh sobiq prezidenti Donald Tramp Grenlandiyani sotib olish masalasini ko‘rib chiqqan. Bu haqda Zamin.uz xabar berdi.
Unga ko‘ra, agar Grenlandiya aholisi referendum orqali orolning AQShga qo‘shilishini ma’qullasa, har bir fuqaroga 1 million dollardan to‘lash taklifi ilgari surilgan. Grenlandiyada taxminan 57 ming kishi yashashi inobatga olinsa, bu tashabbus AQShga qariyb 57 milliard dollarga tushishi mumkin.
Manbalarning ma’lum qilishicha, bu reja AQShning Arktikadagi harbiy ishtirokini kuchaytirishning muqobil yo‘li sifatida ko‘rib chiqilmoqda. Ya’ni, masala faqat iqtisodiy manfaatlar bilan cheklanmay, strategik ahamiyatga ham ega.
Biroq, Daniya hukumati bu boradagi pozitsiyasini aniq bildirgan. Kopengagen Grenlandiyani sotish yoki boshqa davlatga topshirish ehtimolini qat’iyan rad etadi.
Shuningdek, orol maqomiga oid har qanday qaror Daniya roziligini talab qiladi. Daniya tashqi ishlar vaziri Lars Lyokke Rasmussen bu borada aniq fikr bildirib, “Bu sodir bo‘lmaydi.
AQSh Grenlandiyaga egalik qilmaydi. Bu biz uchun qizil chiziq”, deya ta’kidlagan.
Grenlandiya Arktikadagi muhim hududlardan biri bo‘lib, uning strategik ahamiyati sababli bunday takliflar xalqaro siyosiy munozaralarga sabab bo‘lmoqda.
