Rossiya Ukrainaga ommaviy havo hujumi uyushtirdi

Rossiya qo‘shinlari 21-yanvar kechasi Ukrainaga ommaviy havo hujumi uyushtirdi. Bu haqda Zamin.uz xabar berdi.

Ukraina Qurolli Kuchlari Havo kuchlari ma’lumotiga ko‘ra, Qrimdan “Iskander-M” ballistik raketasi uchirilgan, shuningdek, jami 97 ta dron, jumladan, Shahed va boshqa turdagi hujumkor dronlar ishlatilgan. Dronlar Kursk, Oryol, Rostov, Krasnodar, Qrim va Rossiya egallab olgan Donetsk hududlaridan uchirilgan.

Ukraina havo mudofaasi 84 ta dronni urib tushirgan yoki faoliyatini bostirgan. Ballistik raketa va 13 ta dron mamlakatning 11 hududiga zarar yetkazgan, yana bir joyda urib tushirilgan dron parchalari qulagan.

Hujumlar 21-yanvar kuni ertalab va kunduz davomida ham davom etgani ma’lum qilingan. Ukraina Energetika vazirligiga ko‘ra, zarbalar natijasida Dnipropetrovsk, Odessa, Zaporijjya va Xarkiv viloyatlarida elektr ta’minoti qisman uzilgan.

Kiyev va viloyatda esa sovuq ob-havo sabab yuklama ortib, elektr uzilishlari davom etmoqda. Vazirlik ta’mirlash brigadalari va boshqa viloyatlardan jalb qilingan avariya guruhlari uzluksiz ishlayotganini bildirgan.

Prezident Volodimir Zelenskiyning so‘zlariga ko‘ra, Kiyevda 4000 ta uy isitishsiz, binolarning 60 foizi elektrsiz qolgan. Eng og‘ir vaziyat Xarkiv, Sumi, Chernixiv va Dnipropetrovsk hududlarida kuzatilmoqda.

Odessa viloyatida esa bir fuqaro yaralangan, xususiy uy-joylar va sanoat infratuzilmasiga zarar yetgan. Havo hujumlariga qaramay, Ukraina havo mudofaasi faol ishlayotgani, ta’mirlash ishlari davom etayotgani va tizimni tiklash choralari ko‘rilayotgani ta’kidlanmoqda.

Vaziyat murakkab, biroq tizim butunlay izdan chiqqani yo‘q.