Chimkentdagi qotillik: politsiya sustkashligi tanqid qilindi
Qozog‘istonning Chimkent shahrida sodir bo‘lgan mudhish qotillik butun mamlakatni larzaga soldi. Bu haqda Zamin.uz xabar berdi.
11-yanvar kuni shaharda istiqomat qiluvchi Nuroy Serikboy ismli qiz o‘ldirildi. Tergov ma’lumotlariga ko‘ra, uning tanasida bir nechta pichoq jarohatlari aniqlangan.
Mazkur jinoyatda 28 yoshli Sherxon Aymaxon gumon qilinmoqda. U ikki kundan so‘ng shahardan bir necha kilometr uzoqlikda qo‘lga olingan.
Hodisa jamoatchilikda keng muhokama va norozilik uyg‘otdi. Qozog‘iston parlamenti deputati Murat Abenovning ta’kidlashicha, politsiya qizning ota-onasi bergan murojaatlarga o‘z vaqtida e’tibor berganida, ushbu fojia oldini olish mumkin edi.
Deputatning aytishicha, gumonlanuvchi qizni olti oy davomida ta’qib qilgan, uni o‘g‘irlashga uringan, ammo politsiya tomonidan zarur choralar ko‘rilmagan. Ushbu voqea davlat rahbari Qosim-Jo‘mart To‘qayev e’tiboriga tushdi.
Prezident Ichki ishlar vazirligiga Chimkent politsiyasining xatti-harakatlarini sinchkovlik bilan o‘rganishni topshirdi. Natijada Chimkent shahar IIB rahbari va uning o‘rinbosari lavozimidan ozod etildi.
Shuningdek, arizalarni ko‘rib chiqishda sustkashlik qilgan mas’ullarga nisbatan jinoyat ishi qo‘zg‘atildi. Qozog‘istonda yaqinda nikohga majburlash va kelin o‘g‘irlash bo‘yicha qonunlar kuchaytirildi.
Endilikda bunday jinoyatlar uchun qattiq jazo belgilangan. Ammo Nuroy Serikboy bilan bog‘liq voqea shuni ko‘rsatdiki, qonunlarning mavjudligi yetarli emas.
Eng muhim omil — murojaatlarga o‘z vaqtida javob berish va xavfni oldini olishdir.
