Finlyandiya 2026 yilga kelib uy telefonidan voz kechadi
Finlyandiyada XX asrda texnologik taraqqiyotning ramzi hisoblangan stasionar telefon aloqasidan butunlay voz kechish qarori qabul qilindi. Bu haqda Zamin.uz xabar berdi.
Mamlakatning yirik aloqa kompaniyalaridan biri — Elisa, 2026 yil 30 iyunga qadar barcha stasionar telefon tarmoqlarini to‘xtatishini e’lon qildi. Hozirda ushbu xizmatdan foydalanayotgan abonentlar soni bir necha ming kishini tashkil etadi.
Yle axborot agentligining xabar berishicha, 2026 yil aprel oyining oxirida mijozlarga shahar telefoni xizmatidan uzilish haqida rasmiy xat yuboriladi. Ushbu xatda aloqa xizmatini almashtirish bo‘yicha muqobil imkoniyatlar ham taklif etiladi.
Kompaniya ma’lumotiga ko‘ra, abonentlar xizmat tugatilgandan so‘ng ham o‘z uy telefon raqamlarini saqlab qolishlari mumkin. Raqamni mobil tarmoqqa o‘tkazish imkoniyati yaratiladi.
Finlyandiyada boshqa ikki yirik aloqa operatori — Telia va DNA ham stasionar telefon xizmatini bosqichma-bosqich tugatishga qaror qilgan. Telia bu xizmatni 2019 yilda to‘xtatgan bo‘lsa, DNA 2021 yildan boshlab stasionar tarmoqlarni asta-sekin qisqartira boshlagan.
Mahalliy nashrlar bu o‘zgarishni uy telefoni odamlar va oilalar o‘rtasidagi asosiy aloqa vositasi bo‘lgan bir davrning tugashi sifatida baholamoqda.
