AQSh JSSTdan chiqdi: global tibbiyotga moliyaviy zarba
AQSh va Jahon sog‘liqni saqlash tashkiloti (JSST) o‘rtasidagi hamkorlik rasman to‘xtatildi. Bu haqda Zamin.uz xabar berdi.
Donald Tramp ma’muriyati JSST bilan barcha aloqalarni uzish haqida yakuniy qaror qabul qildi. Shu tariqa AQSh tashkilotning eng yirik moliyaviy donori bo‘lish maqomini yo‘qotdi va xalqaro tibbiyot maydonidan chiqib ketdi.
Rasmiy Vashington bu qarorni JSSTning pandemiya davridagi xato boshqaruvi va Xitoyning ta’siriga berilganligi bilan izohladi. Pandemiya davrida JSSTning faoliyati AQSh tomonidan qattiq tanqid qilindi.
AQSh Sog‘liqni saqlash vazirligi tashkilotni COVID-19 inqirozi vaqtida o‘z vazifalarini bajarishda sustkashlikda aybladi. Shuningdek, JSST ichki islohotlarni amalga oshirishga qodir emasligi va ayrim davlatlarning siyosiy bosimlariga berilgani sababli xalqaro sog‘liqni saqlash xavfsizligiga zarar yetkazgani ta’kidlandi.
JSST rahbari Tedros Gebreisus AQShning bu qarorini keskin qoraladi va buni butun dunyo uchun katta yo‘qotish deb atadi. U tashkilotning OIV, poliomiyelit va onalar o‘limiga qarshi kurashdagi muhim yutuqlarini eslatib, AQShning bu qaroridan afsusda ekanini bildirdi.
2025 yil aprelida dunyoning ko‘plab davlatlari vaksinalarni adolatli taqsimlashni ko‘zda tutuvchi yangi shartnomani imzoladi, biroq AQSh bu jarayonda ishtirok etmadi. AQShning JSSTdan chiqishi tashkilot uchun moliyaviy zarba bo‘ldi.
Vashington 2024-2025 yillar uchun belgilangan 260 million dollarlik badallarni to‘lashdan bosh tortdi. Bu esa tashkilotda xodimlar qisqarishi va ko‘plab muhim tibbiy loyihalarning to‘xtashiga olib keldi.
Shuningdek, amerikalik mutaxassislar JSSTning Jeneva va boshqa hududiy bo‘limlaridan chaqirib olindi. Moliyalashtirishning to‘xtatilishi sababli yuzlab qo‘shma loyihalar va ilmiy tadqiqotlar yakunlandi.
JSST rahbariyati hali ham AQShning tashkilotga qaytishidan umid qilmoqda. Mutaxassislarning fikriga ko‘ra, AQShning qayta ishtiroki millionlab insonlarning hayoti va sog‘lig‘ini yaxshilash uchun muhim ahamiyatga ega.
Ushbu qarorning qayta ko‘rib chiqilishi global sog‘liqni saqlash tizimini tiklash uchun zarur chora sifatida ko‘rilmoqda. Sizningcha, AQShning JSSTdan chiqishi yangi pandemiyalarga tayyorgarlik jarayoniga qanday ta’sir ko‘rsatadi?
