Bolalar salomatligi bo‘yicha yangi strategiya tasdiqlandi
UNICEF va Jahon sog‘liqni saqlash tashkiloti (JSST) 2026–2030 yillarga mo‘ljallangan bolalar va o‘smirlar salomatligi hamda farovonligi bo‘yicha yangi strategiyani tasdiqladi. Bu haqda Zamin.uz xabar berdi.
Ushbu dastur Yevropa va Markaziy Osiyo mintaqasini qamrab oladi va ayniqsa, tibbiy xizmatlar yetarli darajada rivojlanmagan past va o‘rta daromadli mamlakatlarga alohida e’tibor qaratiladi. Yangi strategiya avvalgi yondashuvlardan farqli ravishda, faqat natijalarni qayd etish bilan cheklanmaydi.
Unda bolalar salomatligiga salbiy ta’sir ko‘rsatayotgan omillar tizimli ravishda aniqlanib, ularni bartaraf etish ustuvor yo‘nalish sifatida belgilangan. Hujjatda birlamchi tibbiyot tizimida bolalar salomatligi uchun mas’ul mutaxassislar yetishmasligi global muammo ekani ta’kidlangan.
Baholashlarga ko‘ra, 2030 yilga kelib, tibbiyot xodimlari tanqisligi 18 million kishidan oshishi mumkin. Hujjatda zararli mahsulotlar marketingi va reklamasining bolalar salomatligi, ovqatlanishi hamda xulq-atvoriga tahdid solishi haqida alohida qayd etilgan.
Bundan tashqari, zararli kontent va mahsulotlardan bolalarni himoya qilish masalalari bo‘yicha aniq tavsiyalar ishlab chiqilgan. Strategiya beshta asosiy yo‘nalishni o‘z ichiga oladi: ruhiy salomatlik xizmatlarini rivojlantirish, reabilitatsiyani kuchaytirish, sog‘lom ovqatlanishni targ‘ib qilish, emlash qamrovini kengaytirish va zo‘ravonlikning oldini olish.
Shuningdek, maktablarda sog‘lom turmush tarzini shakllantirish, psixologlar va maslahatchilar faoliyatini kuchaytirish, o‘quv dasturlariga sog‘liqni saqlash bo‘yicha amaliy ko‘nikmalar hamda raqamli xavfsizlik mavzularini kiritish rejalashtirilgan. Avvalroq, O‘zbekistonning Oila va gender instituti mamlakatda bolalar o‘limi ko‘rsatkichlari pasaygani haqida ma’lum qilgandi.
Yangi strategiya bolalar va o‘smirlar salomatligini yanada yaxshilashga qaratilgan chora-tadbirlarni o‘z ichiga oladi.
