Boku metropoliteni yangi vagonlar uchun hamkor qidirmoqda
Boku metropoliteni Rossiya poyezdlariga qaramlikni kamaytirish maqsadida yangi strategiyalarni amalga oshirmoqda. Bu haqda Zamin.uz xabar berdi.
Uzoq yillar davomida Rossiyaning “Metrovagonmash” zavodi mahsulotlariga tayanib kelingan bo‘lsa-da, endilikda metropoliten vagonlar parkini diversifikatsiya qilishni boshladi. Bu borada Shveysariyaning Stadler Rail Group kompaniyasi asosiy raqobatchi sifatida ko‘rilmoqda.
Mytishchi zavodi bilan hamkorlik 1967 yildan buyon davom etib kelmoqda. Ushbu davr ichida Bokuga yuzlab vagonlar yetkazib berilgan.
So‘nggi yillarda zamonaviy 50 ga yaqin vagon topshirilgan. Rossiyada ishlab chiqarilgan poyezdlar o‘ziga xos dizayni, maxsus bo‘yoqlanishi va havoni dezinfeksiya qiluvchi tizimlari bilan ajralib turadi.
Biroq Boku metropolitenining kengayish rejasi va yangi yo‘nalishlarni mustaqil boshqarish ehtiyoji rahbariyatni yangi hamkorlar qidirishga undamoqda. 2030 yilgacha 299 ta yangi vagon xarid qilish rejalashtirilgan bo‘lib, loyiha qiymati 3 milliard yevro deb baholanmoqda.
Yevropa investitsiya banki xarajatlarning 50 foizigacha qismini moliyalashtirishga tayyor. Ushbu moliyaviy qo‘llab-quvvatlash xaridlarni Yevropa yoki Xitoy kompaniyalari foydasiga yo‘naltirishni iqtisodiy jihatdan maqsadga muvofiq qiladi.
Metropoliten har bir yo‘nalishda faqat bitta ishlab chiqaruvchining poyezdlarini ishlatish strategiyasini qo‘llamoqchi. Uchta depo esa muayyan turdagi vagonlarga moslashtiriladi, bu esa texnik xizmat ko‘rsatish samaradorligini oshirishi kutilmoqda.
Shu bilan birga, “Metrovagonmash” bilan hamkorlik to‘xtatilmaydi, zavod avval yetkazib berilgan vagonlarning texnik xizmat va ta’mirini ta’minlashda davom etadi. 2026 yilning 23 yanvar kuni Boku metropoliteni rahbari Vusal Aslanov Stadler Rail Group delegatsiyasi bilan uchrashdi.
Muzokaralarda 300 ga yaqin yangi vagon xaridi va zamonaviy boshqaruv tizimini joriy etish masalalari muhokama qilindi. Tender jarayonlari 2026 yil oxirigacha e’lon qilinishi, asosiy xaridlar esa 2028–2030 yillarga to‘g‘ri kelishi kutilmoqda.
Ushbu o‘zgarishlar Boku metropolitenini mintaqadagi ilg‘or transport tizimlaridan biriga aylantirishni maqsad qilgan davlat dasturi doirasida amalga oshirilmoqda. O‘zbekiston metropoliteni esa hozirda to‘liq Mytishchi zavodida ishlab chiqarilgan poyezdlarni qo‘llamoqda.
So‘nggi yangi vagonlar 2023 yil fevral oyida yetkazib berilgan. Shu bilan birga, Toshkent metropoliteni Yunusobod yo‘nalishi uchun vagon deposi qurishni rejalashtirmoqda.
