O‘zbekiston va Turkiya ta’lim sohasida hamkorlikni kengaytiradi

21-yanvar kuni Anqarada O‘zbekiston Tashqi ishlar vazirligi maslahatchisi Munira Aminova Turkiyaning Xorijdagi turklar va qardosh jamoalar boshqarmasi (YTB) rahbari Abdulhadi Turus bilan uchrashuv o‘tkazdi. Bu haqda Zamin.uz xabar berdi.

Uchrashuv davomida tomonlar ta’lim va madaniy almashinuv sohasidagi mavjud hamkorlik holatini tahlil qilib, uni kengaytirishga qaratilgan yangi tashabbuslarni muhokama qildi. Yig‘ilishda YTB stipendiya dasturlari natijalariga alohida e’tibor qaratildi.

Ma’lum bo‘lishicha, 2025-yilda ushbu dasturlar doirasida O‘zbekistonning 228 nafar fuqarosi qabul qilingan bo‘lib, hozirda 136 nafar talaba o‘qishni davom ettirmoqda. YTB dasturlari orqali jami 3 200 nafardan ortiq bitiruvchi ta’limni muvaffaqiyatli yakunlagan.

Ular bilan aloqani mustahkamlash maqsadida maxsus portal tashkil etilgan. Uchrashuvda “Madaniy turk” ensiklopediyasi, Zangturon tashabbusi, zargarlik sohasi hamda shoshilinch tibbiy yordam bo‘yicha o‘quv dasturlari muhokama qilindi.

Shuningdek, axborot texnologiyalari va kiberxavfsizlik, yosh diplomatlar uchun treninglar hamda farmatsevtika sanoatini rivojlantirishga oid yangi loyihalar taklif etildi. Tomonlar yakunda ta’lim va malaka oshirish sohasidagi hamkorlikni yanada mustahkamlashga tayyor ekanliklarini bildirdi.

Ular yuqori malakali kadrlar tayyorlash va professional almashinuvlarni kengaytirishda qo‘shma sa’y-harakatlarning muhimligini alohida ta’kidladi.