Bolgariyada ilk bor prezidentlik ayolga topshirildi
Bolgariyada ilk bor prezidentlik vakolatlari ayol rahbarga topshirildi. Bu haqda Zamin.uz xabar berdi.
2026-yil 23-yanvar kuni Konstitutsiyaviy sud Rumen Radevning iste’fosini rasman tasdiqladi. Shundan so‘ng, prezidentlik vakolatlari avtomatik ravishda vitse-prezident Iliyana Yotova zimmasiga o‘tdi.
Bu haqda ommaviy axborot vositalari xabar berdi. Bolgariya konstitutsiyasiga ko‘ra, Yotova 2027-yil yanvar oyida amaldagi prezidentlik muddati tugaguniga qadar davlat rahbarining vazifalarini bajaradi.
Sud Radevning iste’fosi uning o‘z arizasiga binoan muddatidan oldin qabul qilinganini tasdiqladi. Rumen Radev 2017-yildan buyon prezidentlik lavozimida faoliyat yuritib kelayotgan edi.
U Bolgariyaning zamonaviy tarixida o‘z ixtiyori bilan muddatidan oldin iste’foga chiqqan birinchi prezident bo‘ldi. Radev bu qarorini siyosiy jarayonlarda faollikni oshirish va kutilayotgan parlament saylovlariga tayyorgarlik ko‘rish istagi bilan izohladi.
61 yoshli Iliyana Yotova prezidentlik vakolatlarini qabul qilish uchun qayta qasamyod keltirishga ehtiyoj sezmaydi. U 2022-yilda vitse-prezident sifatida ikkinchi muddatga kirishgan paytda qasamyod qilgan edi.
Radev o‘z xayrlashuv nutqida Yotovaga ishonch bildirdi va uni siyosiy inqiroz sharoitida davlat institutlarining barqarorligini ta’minlashga qodir rahbar sifatida ta’rifladi. Iliyana Yotova siyosat va xalqaro aloqalar sohasida katta tajribaga ega.
Prezident lavozimiga kelguniga qadar u jurnalistika sohasida faoliyat yuritgan, Bolgariya Sotsialistik partiyasining matbuot xizmatini boshqargan, shuningdek, milliy parlament va Yevropa Parlamentida deputat bo‘lgan. Yevropadagi faoliyati davomida terrorizmga qarshi kurash, shaxsiy ma’lumotlarni himoya qilish va Bolgariyaning Shengen hududiga qo‘shilish masalalariga alohida e’tibor qaratgan.
Endilikda Yotovaga xalqaro maydonda mamlakat manfaatlarini himoya qilish, shuningdek, parlament saylovlari sanasini belgilash bo‘yicha mas’uliyat yuklanadi. Kuzatuvchilarning fikriga ko‘ra, uning Yevropa institutlari bilan ishlash tajribasi mamlakat ichidagi siyosiy vaziyatni barqarorlashtirishda muhim ahamiyat kasb etishi mumkin.
