AQShda kuchli bo‘ron: 428 ming kishi chiroqsiz qoldi
AQShda sodir bo‘lgan kuchli qishki bo‘ron oqibatida minglab aholining hayoti izdan chiqdi. Bu haqda Zamin.uz xabar berdi.
PowerOutage.us ma’lumotlariga ko‘ra, mamlakat bo‘ylab 428 mingdan ortiq kishi elektr ta’minotisiz qolgan. Noqulay ob-havo sharoiti nafaqat kundalik hayotga, balki aviatsiya sohasiga ham jiddiy ta’sir ko‘rsatdi.
Fox News xabariga ko‘ra, so‘nggi to‘rt kun ichida Amerika aviakompaniyalari 16 mingdan ortiq reysni bekor qilishga majbur bo‘lgan. The Washington Post ma’lum qilishicha, qishki bo‘ron sababli AQShning kamida 22 shtatida favqulodda holat rejimi joriy etilgan.
Janubi-sharqiy hududlarda muzli yomg‘ir kuzatilgan, bu esa aholi hayotini yanada murakkablashtirgan. Milliy ob-havo xizmati bergan ma’lumotga ko‘ra, Kanzas-Siti shahrida 24-yanvar kuni so‘nggi 70 yil ichida eng yuqori kunlik qor yog‘ish ko‘rsatkichlari qayd etilgan.
Qor qalinligi 13 santimetrga yetgan, bu esa avvalgi rekorddan ikki barobar ko‘pdir. Sinoptiklarning ta’kidlashicha, yaqin kunlarda ham mamlakatning bir qator hududlarida qor yog‘ishi va muzlash davom etadi.
Bu holat elektr ta’minotidagi uzilishlar va transport harakatidagi muammolarni yanada kuchaytirishi mumkin. Fox News xabariga ko‘ra, bo‘ron bir necha kun davom etishi kutilmoqda.
Bu kabi ob-havo sharoitlari aholining kundalik turmush tarziga va infratuzilmalarga katta zarar yetkazmoqda. Mamlakat bo‘ylab favqulodda xizmatlar aholini qo‘llab-quvvatlashga qaratilgan chora-tadbirlarni davom ettirmoqda.
